سوال: وہ رقم جو گھریلو قسم کی قرعہ اندازیوں میں شرکت کے لئے جمع کی جاتی ہے اور خمس کے سال کے وقت تک دریافت نہیں ہوتی، اس سے خمس تعلق رکھتا ہے؟
جواب: اگر وہ رقم آمدنی اور تنخواہ سے تعلق رکھتی ہے تو اس کا خمس، خمس کے سال کے وقت ادا کر دینا چاہئے لیکن ایک رقم اگر قرض کی صورت میں دوسرے کو دی جائے اور خمس کے سال کے وقت قابل دریافت نہ ہو تو آپ اس کا خمس رقم ملنے کے بعد ادا کرسکتے ہیں۔
سوال: وہ رقم جو صدقے کے عنوان سے لوگوں کے درمیان اکٹھا ہوئی ہو اور صدقہ دینے والوں نے اس کے استعمال کے لئے کوئی شرط نہ لگائی ہو، کیا اس کو کسی بھی کار خیر میں لگا سکتے ہیں؟
جواب: صدقہ کسی فقیر کو ہی دیا جاسکتا ہے اور دوسرے امور خیر میں اس کے استعمال کے لئے صدقہ نکالنے والے کی مرضی معلوم کرنا چاہئے۔
سوال: یہ جو کہا جاتا ہے کہ نیک کام کے لئے استخارہ کی ضرورت نہیں ہے تو ان کاموں کی انجام دہی کے طریقے یا انجام دینے کے دوران پیش آنے والے غیر متوقع مسائل کے حوالے سے کیا استخارہ کرنا جائز ہے؟ اور کیا استخارہ غیب کے علم کا ذریعہ سمجھا جا سکتا ہے یا اس سے صرف خدا ہی واقف ہے؟
جواب: استخارہ صرف مباح اور جائز کام کے سلسلے میں شک و شبہہ دور کرنے کے لئے کیا جاتا ہے، اب چاہے شک و تردید نفس عمل میں ہو یا اس کی انجام دہی کے طریقے میں، لہذا جن نیک کاموں میں شک و شبھہ کی کوئی گنجائش نہ ہو اس میں استخارہ کی بھی ضرورت نہیں ہے، اسی طرح استخارہ انسان اور اس کے عمل کے مستقبل کی آگاہی کے لئے نہیں ہے۔
سوال: اگر میں کسی کو نماز کے افعال غلط طور پر انجام دیتے ہوئے دیکھوں تا میرا شرعی فریضہ کیا ہے؟
جواب: اگر وہ غلطی نماز کے بطلان کا باعث بن رہی ہو تو ضروری ہے کہ صحیح مسئلہ بتا دیا جائے۔
سوال: وہ مسجد جو ترقیاتی اور آبادیاتی اسکیم کے تحت سڑک کا حصہ ہو جائے اور اس کا کوئی حصہ مجبورا توڑ دیا جائے، تو کیا مسجد کے منہدم شدہ حصے پر مسجد کے حکم کا اطلاق ہوگا؟
جواب؛ اگر اس کے اپنی پہلی حالت پر واپس آنے کا امکان باقی نہ رہے تو اس پر مسجد کے شرعی احکام کا اطلاق نہیں ہوگا۔
سوال: ایک لڑکی جو ابھی سن بلوغ کو پہنچی ہے اگر روزہ رکھنے کے سبب سخت کمزوری سے دوچار ہوجائے تو اس کے روزے کے سلسلے میں کیا حکم ہے؟
جواب؛ جو لڑکیاں سن بلوغ کو پہنچ جائیں ان پر روزہ رکھنا واجب ہے، روزہ اس لئے چھوڑنا کہ بہت سخت ہے، جسمانی کمزوری آ جائے گی یا اسی طرح کے کسی اور سبب سے، جائز نہیں مگر یہ کہ روزہ ان کے لئے مضر ہو یا روزہ رکھنے میں بہت زیادہ مشقت و تکلیف ہوتی ہو۔
سوال: کیا کسی فالگیر، عامل یا رمّال کے پاس شادی سے متعلق پیشینگوئی کے لئے جانا جائز ہے؟
جواب؛ فالگیر یا رمّال کا کوئی اعتبار نہیں ہے لیکن دعا لکھنے والے عامل کے پاس جانے میں، کہ وہ معصومین علیہم السلام سے نقل شدہ دعاؤں کی بنیاد پر کچھ لکھ دے، کوئی حرج نہیں ہے۔
سوال: آیا عید نوروز کے اعمال (غسل اور روزہ و غیرہ) رجائے مطلوبیت (کہ شاید قبول ہوجائے) کی نیت سے انجام دینا چاہئے؟
جواب؛ پہلی فروردین (یعنی ہجری شمسی سال کے پہلے دن) غسل اور روزہ مستحب ہے لیکن تمام اعمال جو (نماز اور مخصوص دعاؤں کی صورت میں) نوروز کے لئے ذکر ہوئے ہیں رجائے مطلوبیت کی نیت سے انجام دئے جائیں۔
سوال: میں کسی شخص کو کارو بار کے لئے سرمائے کی ایک رقم دینا چاہتا ہوں کہ وہ کام کرے اور ایک معینہ رقم ماہانہ منفعت کے طور پر مجھ کو دیتا رہے، آیا یہ منفعت ربا کا حکم رکھتی ہے؟
جواب: اگر آپ قرض دیتے ہیں اور یہ شرط لگاتے ہیں کہ قرض لینے والا آپ کو ہر ماہ ایک مقررہ رقم دیتا رہے تو یہ سود ہے اور حرام ہے، لیکن اگر آپ کسی کو اپنا تام الاختیار وکیل بنادیں کہ آپ کے پیسے سے وہ آپ کے لئے کام کرے اور حاصل شدہ منفعت سے کچھ آپ کو دے تو اس میں کوئی حرج نہیں۔
سوال: کیا ایک بیمار، جو موت کے بستر پر پڑا ہے، اپنے مال و منال کو (اسی طرح کہ جس طرح شریعت نے بیان کیا ہے) تقسیم کرسکتا ہے؟
جواب: اگر ذہنی طور پر فیصلے کی قوت اور سلامتی پائی جاتی ہے تو کوئی حرج نہیں ہے۔
سوال؛ اگر کوئی نماز جماعت کی صف میں، مثال کے طور پر وضو کرنے کے لیے جاتے وقت مصلی بچھا کر جگہ محفوظ کر لے تو کیا اس جگہ پر اس کا حق، نماز شروع ہو جانے کے وقت تک ہے یا امام جماعت کے رکوع میں چلے جانے کے وقت تک جگہ اس کے لیے محفوظ رہے گی؟
جواب؛ جگہ پر اس کا حق نماز جماعت کے شروع ہونے سے پہلے تک باقی ہے۔
سوال؛ بعض اوقات مسجد میں سجدہ گاہ ہاتھ سے گرکر ٹوٹ جاتی ہے یا دھوتے وقت برتن و غیرہ کی مانند چیزوں کا نقصان ہوجاتا ہے تو کیا اس صورت میں ہم اس کے ضامن ہیں؟
جواب؛ اگر ان کی حفاظت میں کوتاہی نہیں کی ہے تو ضامن نہیں ہے (یعنی نقصان کی تلافی لازم نہیں ہے)
سوال: فٹبال جیسے کھیلوں میں کھلاڑیوں کا ایک دوسرے سے ٹکرانا تقریبا ناگزیر ہوتا ہے اور نہ چاہتے ہوئے بھی دوسرے کھلاڑی کے جسم کو نقصان پہنچتا ہے اور اس کے جسم کا کوئي حصہ لال یا کالا ہو جاتا ہے یا اس سے بھی بری چوٹ پہنچتی ہے۔ جب کھلاڑی اس بات کو جانتے ہوئے بھی کھیل میں حصہ لیتے ہیں تو چوٹ لگنے کی صورت میں کیا دوسرے کھلاڑی پر دیت واجب ہے؟
جواب: فطری طور پر اور رائج حد تک چوٹ لگنے کی صورت میں دیت نہیں ہے لیکن اگر جان بوجھ کر چوٹ پہنچائي گئي ہے تو دیت دینی ہوگي۔
سوال: کسی نے عہد اور نذر کی ہے اگر اس نے کوئي گناہ کیا تو اگلے دن روزہ رکھے گا۔ اس صورت میں اگر وہ جان بوجھ کر کوئي گناہ کرے لیکن اگلے دن کسی ضروری یا غیر ضروری سفر پر چلا جائے تو اسے کیا کرنا چاہیے؟
جواب: اگر سفر غیر ضروری بھی ہو تب بھی اس میں کوئي قباحت نہیں ہے لیکن اسے اس روزے کے بدلے میں قضا روزہ رکھنا ہوگا۔
سوال: اگر کسی میکینک نے اپنے کام کے لیے کوئي رقم طے کی ہو اور کام ختم ہونے کے بعد گاہک کو پتہ چلے کہ وہ بازار کے ریٹ سے زیادہ پیسے لے رہا ہے تو کیا وہی رقم ادا کرنی ہوگي جو طے ہوئي تھی؟
جواب: اگر دونوں رقموں کا فرق اتنا زیادہ ہے کہ عام طور پر لوگ اسے نظر انداز نہیں کرتے ہیں گاہک معاملے کو فسخ کر سکتا ہے اور اجرت المثل (اس جیسے معاملے میں ادا کی جانے والی اجرت) ادا کر سکتا ہے۔
سوال: کیا شادی جیسے فیصلہ کن امور میں تسبیح یا قرآن سے استخارہ جائز ہے؟
جواب: بہتر ہے کہ جن امور کے بارے میں انسان فیصلہ کرنا چاہتا ہے، پہلے غوروفکر کرے، تجربہ کار اور باوثوق لوگوں سے مشورہ لے اور اگر ا ن کاموں کے باوجود اس کا تذبذب دور نہ ہو تو وہ استخارہ کر سکتا ہے۔
سوال: دوسرے لوگ نابالغ بچے کو جو پیسے تحفے کے طور پر دیتے ہیں، کیا اسے ہم بچے کی ضروریات (کھانے اور کپڑے وغیرہ) پر خرچ کر سکتے ہیں؟ یا پھر اس پیسے کو بچے کے بالغ ہونے تک سنبھال کر رکھنا، اس کے سرپرست پر واجب ہے؟
جواب: اگر سرپرست کی جانب سے اس طرح کے خرچ کرنے سے بچے کے لیے کوئي برائی اور نقصان نہ ہو تو جائز ہے۔
سوال: کیا تشریح کا جہاد اور اس سافٹ وار سے مقابلہ، جو اسلام کے دشمنوں نے میڈیا، سائبر اسپیس اور سوشل میڈیا وغیرہ میں چھیڑ رکھی ہے، واجب شرعی ہے؟
جواب: اگر سماج کے اندر زمینی طور پر سائبر اسپیس میں اور میڈیا میں کوئي برائي انجام پا رہی ہو یا واجب کو ترک کیا جا رہا ہو، جیسے مذہبی عقائد اور تعلیمات کو کمزور کیا جائے یا اسلام کے مقدسات اور احکام الہی کا استہزاء کیا جائے یا ان کی اہانت کی جائے تو ان سبھی پر، جو حقائق کو بیان کرنے اور ان کا دفاع کرنے کی توانائي رکھتے ہیں اور اثر انداز ہو سکتے ہیں، واجب کفائي اور فوری ہے کہ وہ اپنی ذمہ داری پر عمل کریں۔
سوال: بیع نامے میں ایک فلیٹ کا رقبہ 88 میٹر لکھا ہوا ہے لیکن دو سال بعد جب گھر کی دستاویز تیار ہوئي تو پتہ چلا کہ فلیٹ کا رقبہ 97 میٹر ہے، کیا گھر بیچنے والے کو خریدار سے باقی کے رقبے کی رقم کا مطالبہ کرنے کا حق ہے؟
جواب: اگر گھر کو رقبے کی بنیاد پر (یعنی ہر میٹر کے بدلے فلاں رقم پر) بیچا ہو تو وہ اضافی رقبے کے بدلے قیمت کا مطالبہ کر سکتا ہے یا سودے کو منسوخ کر سکتا ہے، لیکن اگر بیچنے والے نے اپنے حساب سے یا کسی دوسرے اندازے کے مطابق 88 میٹر کے فلیٹ کو ایک معینہ رقم کے بدلے بیچا ہو تو اسے صرف معاملے کو منسوخ کرنے کا حق حاصل ہے۔
سوال: کچھ عرصہ گزرنے کے بعد یہ پتہ چلا کہ جو گاڑی میں نے خریدی تھی اس کے انجن میں بنیادی نقص تھا۔ اس بات کے پیش نظر کہ جو ايگریمینٹ ہوا ہے، اس میں یہ لکھا ہوا ہے کہ گاڑی پوری طرح سے ٹھیک ہے اور سودے کو فسخ کرنے کا خریدار کا حق محفوظ ہے، کیا یہ عرصہ گزر جانے اور گاڑی کے دستاویز باضابطہ طور پر ٹرانسفر ہونے کے بعد میں شرعی طور پر سودے کو منسوخ کر سکتا ہوں؟
جواب: آپ سودے کو منسوخ کر سکتے ہیں یا بیچنے والے سے ارش (صحیح سالم اور معیوب گاڑی کی قیمت کے درمیان فرق کا پیسہ) لے سکتے ہیں۔
سوال: اگر کسی نے غیبت کی ہے یا کسی دوسرے پر تہمت لگائي ہے تو کس طرح اپنے گناہ کی توبہ کرے؟ کیا اس شخص کو راضی کرنا ہوگا؟
جواب: جس بڑے گناہ کا اس نے ارتکاب کیا ہے اس پر پشیمانی کے ساتھ خداوند عالم سے استغفار کرے، تہمت کی تردید کرے اور جس شخص کی غیبت کی ہے اور جس پر تہمت لگائي ہے، اس سے معافی مانگ کر اسے راضی کرے اور اگر یہ ممکن نہ ہو یا اس میں زیادہ برائي کا اندیشہ ہو تو اس کے لیے استغفار کرے۔
سوال: کیا شرعی طور پر یہ وصیت کی جا سکتی ہے کہ مرنے کے بعد جو میراث ہے، اسے تب تک تقسیم نہ کیا جائے جب تک معینہ وراثوں میں سے کوئي ایک زندہ ہے؟ یعنی میراث کی تقسیم کو اس معینہ وارث کی موت کے بعد تک کے لیے مؤخر کیا جا سکتا ہے؟
جواب: اگر مرنے والے کی زندگي میں یا اس کی موت کے بعد تمام ورثاء، اس کی وصیت کو تسلیم کر لیں تو اس کی وصیت نافذ العمل ہے اور اگر ایسا نہیں ہے تو صرف اس کے اموال کے ایک تہائي حصے کے لیے اس کی وصیت نافذ العمل ہوگي۔
سوال: اگر کوئي کسی خط یا میسیج میں پہلے سلام کرے اور پھر کوئي مسئلہ پوچھے تو کیا اس کا جواب دینا واجب ہے؟
جواب: سلام کا جواب براہ راست ملاقات، ٹیلی فونی گفتگو وغیرہ کے علاوہ واجب نہیں ہے
سوال: اپنے مبتلا بہ مسائل (وہ مسائل جن سے انسان کا اکثر واسطہ پڑتا رہتا ہے) کو نہ سیکھنے سے انسان گنہگار ہوگا؟
جواب: اگر ان مسائل کو نہ سیکھنے کا نتیجہ واجب کام کو ترک کرنے یا حرام کام کے ارتکاب کی صورت میں نکلتا ہو تو وہ گنہگار ہے۔
سوال: کرائے کی مدت پوری ہو جانے کے بعد دکان یا مکان کو خالی کرنے کے لیے کیا کرائے دار مالک سے کچھ رقم پگڑی کے نام پر مانگ سکتا ہے؟
جواب: جس شخص کے کرائے کی مدت پوری ہو چکی ہو اور وہ پگڑی کا مالک نہیں ہے تو اس کے ذریعے پگڑی کے نام پر مالک سے کچھ بھی لینا حرام ہے۔
سوال: اگر نماز جماعت کی کوئي صف اتنی طویل ہو کہ اس کے طولانی ہونے کی وجہ سے (رکاوٹ کی وجہ سے نہیں) امام جماعت یا اگلی صف نظر نہ آئے تو کیا اس صف کا اتصال قائم ہے؟
جواب: مذکورہ صف میں اتصال قائم ہے۔
سوال: اگر ہم مسجد یا امام بارگاہ جیسی کسی جگہ پر پہنچیں جہاں سبھی لوگ قرآن مجید کی تلاوت، نماز یا اسی طرح کے دیگر کاموں میں مصروف ہوں تو کیا انھیں سلام کرنا مستحب ہے؟
جواب: سلام کرنا اپنے آپ میں ہر حالت میں مستحب ہے (اور آپ کے سوال کا جواب یہ ہے کہ اگر ایک شخص بھی آپ کے سلام کا جواب دے دے تو کافی ہے) لیکن جو شخص نماز پڑھ رہا ہے، اسے سلام کرنا مکروہ ہے۔
سوال: کئی سال سے بیت المال سے متعلق اشیاء میرے پاس ہیں اور اب میں ان سے بری الذمہ ہونا چاہتا ہوں، میری ذمہ داری کیا ہے؟
جواب: آپ کے پاس بیت المال کی جو اشیاء ہیں، اگر وہ کسی خاص سرکاری ادارے کی سرکاری اشیاء میں سے ہیں تو آپ امکانی صورت میں وہ اشیاء اسی ادارے کو لوٹا دیں ورنہ حکومت کے عمومی اثاثہ جات کے ادارے کو دے دیں۔
سوال: بلڈنگ کے مینٹینینس کی رقم کے تعین کے طریقے کے لیے کیا اس عمارت میں رہنے والے سبھی لوگوں کی رضامندی ضروری ہے؟
جواب: یہ بات، عمارت میں رہنے والوں کے ایگریمنٹ کی کیفیت اور مینیجر کو دیے گئے اختیارات کے تابع ہوگي۔ اگر دیگر قوانین، عمارت میں رہنے والے اکثر لوگوں کی رضامندی سے طے ہوتے ہیں تو اس مسئلے میں بھی اکثریت کی رضامندی کافی ہوگي۔
سوال: ان استعمال شدہ کاغذوں کا شرعی حکم کیا جن پر اسمائے مبارک (اللہ اور معصومین علیہم السلام کے نام) لکھے ہوئے ہیں؟ کیا انھیں جلایا جا سکتا ہے؟
جواب: انھیں مٹی میں دفن کر دینے یا لگدی میں تبدیل کر دینے میں کوئي قباحت نہیں ہے لیکن انھیں جلانے سے پرہیز کرنا چاہیے۔
سوال: کیا ہرولہ کرنا اور شور (بلند آواز میں تیزی کے ساتھ ائمہ علیہم السلام کا نام لینا) جائز ہے؟
جواب: اگر یہ اس طرح ہو کہ مذہب اور معصومین علیہم السلام کی عزاداری کے پروگراموں کی توہین کا سبب نہ ہو تو اپنے آپ میں، اس میں کوئي حرج نہیں ہے۔
سوال: کچھ لوگوں نے ماتمی انجمن میں کھانا کھلانے کے لیے چاول اور گوشت دینے کی نذر کی ہے، اگر چاول، گوشت سے زیادہ ہو تو کیا اس اضافی مقدار کو فروخت کر کے گوشت یا کھانے کا دیگر سامان خریدا جا سکتا ہے؟
جواب: نذر اور ہدیے کی چیزیں، اسی جہت میں استعمال ہونی چاہیے جس میں نذر کرنے والے یا ہدیہ دینے والے نے کہا ہے اور نیت کی ہے اور اگر نذر کرنے والے نے نذر کے شرعی الفاظ زبان سے ادا نہ کیے ہوں تو اس کی جانب سے دی گئي چیزوں کو اس کی اجازت سے تبدیل یا دوسرے جگہ پر استعمال کیا جا سکتا ہے۔
سوال: میں نے نذر کی تھی کہ اگر یونیورسٹی میں داخلہ مل گيا تو امام حسین علیہ السلام کے اربعین کے دن تبرک میں کھانا بانٹوں گا۔ کیا میں کھانے کی جگہ اس کی رقم سے محتاجوں کی مدد کر سکتا ہوں؟
جواب: اگر آپ نے نذر کے مخصوص الفاظ، جو شرعی احکام کی کتابوں میں درج ہیں، ادا نہیں کیے ہیں تو نذر پر عمل کرنا ضروری نہیں ہے اور آپ اسے تبدیل کر سکتے ہیں لیکن اگر آپ نے نذر کے مخصوص الفاظ ادا کیے ہیں تو پھر آپ کو نذر کے مطابق ہی عمل کرنا ہوگا۔
سوال: اس مال (کمیشن) کا، جو بعض فروخت کنندگان، آفسوں یا کمپنیوں کے خریداری ایجنٹ کو، طے شدہ قیمت میں بڑھائے بغیر، رابطہ قائم کرنے کی وجہ سے دیتے ہیں، فروخت کرنے والے اور خریداری ایجنٹ کے لیے کیا حکم ہے؟
جواب: فروخت کنندہ کی جانب سے خریداری ایجنٹ کو یہ مال دینا جائز نہیں ہے اور ایجنٹ کے لیے بھی انھیں لینا جائز نہیں ہے اور جو کچھ اس نے لیا ہے اسے اس آفس یا کمپنی کے حوالے کر دینا چاہیے جن کی خریداری کا وہ ایجنٹ ہے۔
سوال: آبی جانوروں کی کون سی قسمیں حلال گوشت ہیں؟
جواب: آبی جانوروں میں سے صرف چھلکے والی مچھلی، جھینگا اور بعض آبی پرندے حلال ہیں اور بقیہ دیگر حلال نہیں ہیں۔