آیت اللہ العظمی خامنہ ای نے امن قائم کرنے میں پولیس فورس کے بنیادی کردار کی جانب اشارہ کرتے ہوئے فرمایا کہ پولیس فورس کی توانائیاں اور مستعدی اور اس محکمے کے اہلکاروں کا عزم و ایمان روز بروز بڑھتا رہنا چاہئے۔
رہبر انقلاب اسلامی کا کہنا تھا کہ سیکورٹی کے معنی ہیں انفرادی طور پر فکری و نفسیاتی آسودگی اور سماجی امن و چین۔ آپ نے فرمایا کہ اگر سیکورٹی نہ ہو تو کسی بھی سماج کے افراد کے اندر جذبات اور توانائیاں موجود ہونے کے باوجود گوناگوں اقتصادی، ثقافتی، سیاسی اور خدمت رسانی کی سرگرمیاں انجام نہیں دی جا سکتیں۔
رہبر انقلاب اسلامی نے قرآن سے حوالہ دیتے ہوئے تحفظ اور سلامتی کو مومنین کے ایمان میں اضافے کا باعث قرار دیا اور فرمایا کہ ملکی سلامتی کا ایک اہم ستون محکمہ پولیس ہے، البتہ یہ عظیم ستون ایسی افرادی قوت پر استوار ہے جس میں اکثریت شریف، کارآمد اور محنت کش افراد کی ہے اور ضرورت اس بات کی ہے کہ ان اہلکاروں کے عزم و ایمان اور جوش و جذبے کو مزید تقویت پہنچائی جائے۔
رہبر انقلاب اسلامی نے ملک میں پولیس فورس کی وسیع خدمات کی جانب اشارہ کرتے ہوئے معاشرے کے افراد سے براہ راست رابطے میں رہنے کے باعث پولیس اسٹیشنوں کے کردار پر توجہ مرکوز کئے جانے پر تاکید کی۔
مسلح فورسز کے سپریم کمانڈر رہبر انقلاب اسلامی آیت اللہ العظمی خامنہ ای نے مختلف شعبوں میں تیز رفتاری سے ہونے والی تبدیلیوں منجملہ سائنس و ٹیکنالوجی کے میدان میں سرعت کے ساتھ ہونے والی پیشرفت کا حوالہ دیا اور آمادگی بڑھانے، توانائیوں کی جدیدکاری، فرائض کی شناخت اور مکمل انجام دہی، عوام کے لئے انجام دی جا رہی خدمات اور سرگرمیوں سے میڈیا کے ذریعے عوام کو باخبر کرنے کی ضرورت پر زور دیا اور اسے ملکی سلامتی اور سیکورٹی میں مزید بہتری کا سبب قرار دیا۔
اس ملاقات سے قبل حاضرین نے رہبر انقلاب اسلامی کی اقتدا میں نماز ظہرین ادا کی۔