سوال: کیا مہمان کا فطرہ میزبان کے ذمے ہے؟ جواب: ایک رات کے مہمان کا فطرہ، میزبان کے ذمے نہیں ہے، سورج ڈوبنے سے پہلے میزبان کے پاس آنے والے مہمان کے فطرے کے وجوب میں یہ شرط ہے کہ وہ میزبان کے نان خواروں اور اس کے گھرانے کے افراد میں شمار ہو جیسے نوکر یا بعض رشتہ دار جو ہر کچھ دن بعد میزبان کے گھر آ کر کچھ دن رہتے ہیں۔

سوال: اگر روزہ دار نے مغرب کے وقت کسی جگہ روزہ افطار کر لیا ہو اور پھر وہ کسی ایسی جگہ سفر کر جائے جہاں ابھی مغرب کا وقت نہ ہوا ہو تو اس کے روزے کا کیا حکم ہے؟ کیا اس کے لیے اس جگہ مغرب سے پہلے کچھ کھانا پینا جائز ہے؟ جواب: اس کا روزہ صحیح ہے اور اِس فرض کے ساتھ کہ اس نے اپنی سرزمین پر مغرب کے وقت افطار کر لیا تھا، سفر کی جگہ پر مغرب سے پہلے اس کے لیے کھانا پینا جائز ہے۔

سوال: رمضان کے مبارک مہینے میں روزہ داروں کو انجیکشن اور اسی طرح دوسری چیزیں انجیکٹ کرنے کے بارے میں آپ کی کیا رائے ہے؟ جواب: احتیاط واجب یہ ہے کہ روزہ دار طاقت افزا اور مغذّی انجیکشن، رگ میں لگائے جانے والے ہر انجیکشن اور مختلف طرح کی ڈرپس سے اجتناب کرے لیکن اینٹی بایوٹک یا مسکّن جیسے پٹھوں میں لگائے جانے والے غیر طاقت افزا انجیکشن یا جسم کے کسی حصے کو بے حس کرنے کے لیے لگائے جانے والے انجیکشنوں میں کوئی حرج نہیں ہے

سوال: تعلیم کے دوران دارالاقامہ (ہاسٹل) جس میں طالب علم، ہفتے میں پانچ دن رہتے ہوں، کیا وطن کا حکم رکھتا ہے؟ جواب: کوئي بھی تعلیمی مرکز یا عارضی اقامت گاہ، وطن نہیں ہے، البتہ اگر کسی نے طے کر لیا ہے کہ کم از کم ایک سال تک اس طرح کی سکونت رہے گی کہ عرف عام میں اسے مسافر نہ سمجھا جائے تو دس روز کے قصد سکونت کے بغیر بھی نماز پوری پڑھی جائے گی۔

سوال: کیا ایسے مقابلوں میں، جن میں جیتنے والوں کو انعام دیا جاتا ہے، شرکت کرنا اور انعام لینا جائز ہے؟ جواب: ایسی صورت میں کہ اس سے کوئی خرابی یا برائی پیدا نہ ہو اور اس طرح کا مقابلہ نہ ہو کہ ہارنے والے سے ایک رقم وصول کریں اور جتنے والے کو دے دیں تو اس میں بذات خود کوئی حرج نہیں ہے۔

سوال: ایک شخص نذر کرتا ہے کہ فلاں عبادی عمل فلاں وقت معین پر انجام دے گا (مثال کے طور پر ایک خاص دن روزہ رکھے گا یا ایک خاص وقت میں نماز پڑھے گا) لیکن کسی بھی وجہ سے، جان بوجھ کر یا بھولے سے اس نذر پر عمل نہیں کرتا تو کیا اس عمل کی قضا ہے؟ جواب: روزے کے علاوہ دوسرے اعمال کی قضا نہیں ہے اگرچہ جان بوجھ کر نذر کی خلاف ورزی پر کفارہ دینا ہوگا۔

سوال: ایک مسجد جو پرانے زمانے سے وقف کی ہوئی ہے اور ہمیں وقف کرنے والے کی نیت علم کا نہیں ہے تو کیا مسجد کے اوپر ایک اور منزل بناسکتے ہیں یا مسجد کے نیچے تہہ خانہ بنا سکتے ہیں اور اسے کرائے پر دے سکتے ہیں تاکہ مسجد کے لئے آمدنی کا ایک ذریعہ رہے؟ جواب: جس جگہ پر مسجد ہے وہاں غیر مسجد کے عنوان سے بالائی منزل یا تہہ خانہ بنانا شرعی طور پر ممکن نہیں ہے اور نئي تعمیر شدہ منزل اور تہہ خانہ بھی مسجد ہی کے حکم میں ہوں گے اور انھیں کرائے پر دینا صحیح نہیں ہے۔

سوال : اگر کسی شخص کو ایک رقم کی ضرورت پیش آجائے تو کیا جائز ہے کہ وہ ایک چیز ادھار کی صورت میں حقیقی قیمت سے زیادہ میں خرید لے اور پھر اس کو اسی جگہ کم قیمت پر بیچنے والے ہاتھ فروخت کردے، مثال کے طور پر کچھ مقدار میں سونا ایک معینہ رقم پر ایک سال کے لئے ادھار میں خرید لے اور اسی نشست میں اسے، بیچنے والے کو ہی نقد کی صورت میں دوتہائی قیمت پر بیچ دے؟  کیا ایسا کرنا جائز ہے؟ جواب : اس طرح کا سودا، جو در اصل قرض کے سود سے بچنے کے لئے ایک طرح کا ہتھکنڈہ ہے، شرعی طور پر حرام اور باطل ہے۔  

سوال: رہائشی بلڈنگوں میں رہنے والے بعض افراد، بلڈنگ کے مشترکہ حصوں کو تصرف میں لاتے ہیں جس پر دوسرے رہنے والے راضی نہیں ہوتے مثال کے طور پر بلڈنگ کے آنگن میں ورزش کرتے ہیں۔ کیا اس طرح کا تصرف جائز ہے؟ جواب: اگر اس سلسلے میں کوئی قانون یا شرط وغیرہ پہلے سے موجود ہے جس کے مطابق یہ تصرف جائز ہے تو دوسروں کی ناراضگی کوئی اثر نہیں رکھتی یہ اور تصرف جائز ہے لیکن اگر ایسا نہیں ہے تو تمام مالکوں کی رضامندی ضروری ہے۔

سوال: بعض اوقات تعمیر و مرمت کا کام کرنے والا کاریگر کام لیتے وقت مزدوری کی بات نہیں کرتا اور آجر بھی کام کے بعد کاریگر کے مطالبے کو زیادہ سمجھتا ہے اور قبول نہیں کرتا ایسے میں حکم کیا ہے؟ جواب : اس صورت میں کاریگر کو اس کام کے لئے جو اس نے انجام دیا ہے صرف (اجرت المثل) یعنی اس طرح کے معاملہ میں رائج اجرت کا مطالبہ کرنے کا ہی حق ہے۔

سوال: اگر کسی نے خط یا سوشل میڈیا کے ذریعے سلام کیا ہے تو کیا اس کے سلام کا جواب واجب ہے؟  جواب: بنیادی طور پر سلام کا جواب، روبرو ملاقات، ٹیلی فونی گفتگو یا اس جیسی بات چیت کے علاوہ واجب نہیں ہے۔    

سوال: وہ قدیم مسجد، جو اب نماز اور دیگر مراسم کی ادائیگی کے لئے مناسب نہیں رہ گئی ہے اور اس کی توسیع کی ضرورت ہے، کیا اسے ڈھا کر نئے سرے سے تعمیر کیا جاسکتا ہے؟ اگر مسجد کے بانی راضی نہ ہوں تو اس کا کیا حکم ہے؟!  جواب: لوگوں کی ضرورت کے پیش نظر توسیع کے لئے قدیم مسجد کے ڈھانے میں کوئی حرج نہیں ہے، اس میں مسجد کے بانی کا راضی نہ ہونا، رکاوٹ نہیں ہے۔

سوال: کربلائے معلیٰ میں اربعین کے دن حتی اس سے پہلے اور بعد میں حسینی عزاداروں کی بڑی تعداد اور  شدید بھیٹر کے پیش نظر کیا زیارت اربعین کا ثواب اس سے کچھ دنوں پہلے اور بعد میں، وہی ہے جو اربعین کے دن کی زیارت کا ثواب ہے؟  جواب: سید الشہداء علیہ السلام کی زیارت، چاہے جس وقت بھی ہو، مستحب ہے اور عظیم ثواب کی حامل ہے لیکن کسی خاص وقت میں زیارت کا ثواب اسی مخصوص وقت سے تعلق رکھتا ہے، البتہ اس سے پہلے یا بعد میں، اس مخصوص ثواب کے حصول کی امید کے ساتھ زیارت کرنے میں کوئی حرج نہیں ہے۔  

سوال : کیا قابل ذکر مال کے تحفہ دینے یا ایک بڑے قرض کے معاف کر دینے جیسے اہم مالی تصرفات کے صحیح ہونے کے لئے ایک بچے کا شرعی طور پر سن بلوغ کو پہنچ جانا (مثلاً ایک لڑکی کا سن نو سال ہو جانا) کافی ہے؟! جواب : مذکورہ مالی تصرفات کے جائز ہونے کے لئے سن بلوغ تک پہنچنے کے علاوہ عقلی رشد کے مرحلے تک پہنچنا بھی ضروری ہے یعنی وہ اپنے اچھے برے کو سمجھنے اور مالی امور کی تشخیص کے لائق ہو جائے اور اپنے مال کو صحیح مقام پر خرچ کرے۔

سوال: بعض لوگ پہلی محرم سے صفر کے آخر تک امام حسین علیہ السلام کی عزاداری کے احترام میں کالے لباس پہنتے ہیں، کیا یہ عمل باوجود اس کے کہ دو مہینوں تک جاری رہتا ہے، پسندیدہ شمار ہوتا ہے اور کیا اس میں کراہت نہیں پائی جاتی؟ جواب: خاندان عصمت و طہارت علیہم السلام کی عزاداری کے ایام میں کالے لباس پہننا، الہی شعائر کی تعظیم اور حزن و غم کے اظہار کی غرض سے اللہ کی جانب سے ثواب کا باعث بنتا ہے۔

سوال: میں کمپیوٹر کا پروگرامر ہوں اور مجھے مختلف کام کا آرڈر ملتا ہے، کیا میں ان فرمائشوں کو کسی اور کے حوالے کرسکتا ہوں؟ اور اس کام کی مقررہ اجرت سے، کام کی پیشکش میں وسیلہ قرار پانے والے کے عنوان سے اپنے لئے کمیشن کے طور پر ایک رقم لے سکتا ہوں؟ جواب: اگر شرط لگادی جائے یا قرائن سے پتہ چلتا ہو کہ کام خود آپ انجام دیں تو کام دوسرے کے حوالے کردینا جائز نہیں ہے، لیکن اگر ایسا نہ ہو تو قیمت و اجرت بڑھاکر یا برابر کی قیمت پر ہی کام دوسرے کے حوالے کرسکتے ہیں مگر یہ کہ کام کا ایک حصہ آپ انجام دے چکے ہوں تو ایسی صورت میں آپ کم قیمت پر کام دوسرے کے حوالے کرسکتے ہیں۔

سوال: ایک شخص اپنے کام کے لئے (جس کی نوعیت سروسز اور اشتہارات کی ہے نہ کہ تجارتی) دوسروں سے پیسے لیتا ہے اور اس سے حاصل منافع کو دینا چاہتا ہے؛ وہ کس طرح شرعی معاہدے کے تحت یہ کام کرسکتا ہے؟ جواب: وہ ’’عقد وکالت‘‘ کے تحت معاہدہ کرسکتا ہے اس صورت میں کہ سرمائے کا مالک اسے وکیل بنادے کہ وہ اس کی رقم سے پیش نظر اقتصادی کاروبار انجام دے اور اس سے جو فائدہ ہو ماہانہ طور پر یا معاہدے کے اختتام پر معینہ مقدار میں ایک رقم (معاہدے کے مطابق) اس کو دے دے اور بقیہ رقم اپنی وکالت کی اجرت کے عنوان سے لے لے۔  

سوال: کیا کسی خریدی ہوئی جنس کے ہاتھ آجانے سے پہلے ہی کسی دوسرے کو بیچ سکتے ہیں؟ مثال کے طور پر انٹرنٹ کے ذریعے کوئی چیز خریدیں اور قبضے میں آئے بغیر ہی انٹرنٹ پر ہی اس کو کسی اور کے ہاتھ بیچ دیں؟ جواب: اگر معاملہ نقدی تھا اور اس معاملہ میں پہلے سے ہی کوئی شرط نہیں تھی تو کوئی حرج نہیں ہے، لیکن اگر معاملہ سَلَف ہو (یعنی جنس پر قبضے کے لئے مدت درکار ہو) تو اسی صورت میں جائز ہے کہ چیز آپ کے قبضے میں آچکی ہو یا کم سے کم اس چیز کے تحویل یعنی قبضے میں لینے کا وقت آچکا ہو۔

سوال: کسی ثبوت کے بغیر دوسروں پر تہمت لگانے کا حکم کیا ہے اور جس نے تہمت باندھی ہے اس کا کیا فریضہ ہے؟ جواب: ’’تہمت‘‘ گناہان کبیرہ میں سے ہے اور پوری سنجیدگی کے ساتھ اس سے واقعی توبہ لازم ہے اور جس کسی سے بھی اپنی بات کہی اور پہنچائی ہے اسے مسترد کرے اور جس کے بارے میں کہی ہے اس سے رضامندی حاصل کرے (کہ اس نے معاف کردیا ہے)