بسم الله الرحمن الرحيم

«وَاذْكُرُوا إِذْ أَنْتُمْ قَلِيلٌ مُسْتَضْعَفُونَ فِي الْأَرْضِ تَخَافُونَ أَنْ يَتَخَطَّفَكُمُ النَّاسُ فَآوَاكُمْ وَأَيَّدَكُمْ بِنَصْرِهِ وَرَزَقَكُمْ مِنَ الطَّيِّبَاتِ لَعَلَّكُمْ تَشْكُرُونَ».

الحمد لله رب العالمين، الحمد لله الذي أمرنا بالإسلام، والصلاة والسلام على سيد المرسلين سيدنا وقائدنا محمد، وعلى آل بيته و من

والاه إلى يوم الدين.

بخدمت اقدس رہبر انقلاب اسلامی آيت  اللہ سید علی خامنہ ای دام ظلکم و برکاتکم

السلام عليكم و رحمة الله و بركاته

اپنی طرف سے، اعلی کمان میں اپنے بھائیوں کی طرف سے، جہاد اسلامی کے مجاہدین اور قدس کے فوجی دستوں کی طرف سے ملت فلسطین، سرفراز مزاحمتی فورس اور ان کے بہادروں کو صیہونی دشمن اور اس حکومت کی سرکشی و استکبار کے خلاف ملنے والی فتح کی آپ کو مبارکباد پیش کرتا ہوں۔

تمام میدانوں میں آپ کی دائمی، مستقل اور اعلانیہ پشت پناہی کا سیف القدس آپریشن اور اس کے نتیجے میں ملنے والی کامیابیوں میں بہت بڑا اور نمایاں رول رہا۔ مزاحمتی محاذ کے مجاہدین نے دشمن کی فوجی برتری کے باوجود اپنی پوری قوت، اقتدار اور شجاعت و بہادری سے اس جنگ میں قدم رکھے۔ ملت فلسطین کی استقامت و فتح نصرت پروردگار کے بغیر ممکن نہیں تھی۔ نصرت خداوندی کے نتیجے میں ہمارے معمولی وسائل طاقتور بن گئے اور عوام جنہیں یہ خوف لاحق تھا کہ کہیں ان کا صفایا نہ کر دیا جائے دشمن کی نگاہ میں بہت بڑے اور طاقتور ظاہر ہوئے۔

فلسطین کے عوام اور مزاحمت نے اس معرکے میں جس نے دنیا بھر کے مومنین کو خوشنودی عطا کی، دشمن کی ناک زمین پر رگڑ دی اور صیہونی حکومت کو ایک بار پھر مکڑی کے جالے سے بھی کمزور ثابت کر دیا۔ ان تاریخی لمحات میں آپ کا اور قدس فورس کے اندر اپنے بھائیوں کا شکریہ و قدردانی کرتا ہوں جو ایک طویل عرصے سے ہر قدم پر ہمارے ساتھ رہے اور جو بھی توانائی، ٹیکنالوجی اور مدد ان کے لئے میسر تھی بے مثال خلوص کے ساتھ ہمیں دے دی تاکہ آج جیسا اہم اور با برکت دن دیکھنا نصیب ہو۔

ضروری ہے کہ شہید عزیز اور ہمارے ہر دل عزیز کمانڈر الحاج قاسم سلیمانی کو یاد کروں جنہوں نے اپنی شہادت سے بڑا عظیم مرتبہ حاصل کیا، واقعی ان تاریخی لمحات میں ان کی کمی کا ہمیں شدت کے ساتھ احساس ہے۔

شہید سلیمانی کے دوست اور بھائي خاص طور پر الحاج اسماعیل قاآنی اور ان کے رفقائے کار اس جنگ کی کمان سنبھالنے کے عمل میں ہر لمحہ ہمارے ساتھ رہے اور واقعی ان کی موجودگی ہمارے لئے بڑی با برکت اور ثمر بخش رہی۔

اللہ تعالی کی بارگاہ میں دعا ہے کہ آپ کی حفاظت فرمائے، ہمارے سروں پر آپ کے بابرکت وجود کا سایہ قائم رکھے۔ ہم اسلامی جمہوریہ ایران اور اس کے بہادر مجاہدین کی حفاظت کی دعا کرتے ہیں۔ 

و الحمد لله رب العالمين.

آپ کا مخلص

زیاد رشدي النخاله

سیکریٹری جنرل

جہاد اسلامی  فلسطين

جمعه ۳۱ اردیبهشت ۱۴۰۰

(مطابق 21 مئی 2021)