اب آئیے ایک نظر ڈالتے ہیں وطن عزیز اور عظیم الشان ملت ایران پر۔ میری خواہش یہ ہوتی ہے کہ جو کچھ بیان کروں اور جس بارے میں سوچوں وہ عقل و منطق کے دائرے میں ہو۔ نعرے بازی والی باتیں کرنا مجھے پسند نہیں ہے۔ کسی بھی مسئلے میں اور خاص طور پر انقلاب کے معاملے میں میں لاف و گزاف بیان کرنے اور مبالغہ آرائی سے متفق نہیں ہوں۔ ہمیں یہ دیکھنا چاہئے کہ حقائق کیا ہیں، عقل و منطق کی رو سے کون سی بات درست ہے۔
ملت ایران دشمنوں کے ایک گروہ سے بر سر پیکار ہے، دشمنی کا آغاز اسی گروہ کی جانب سے ہوا ہے، دشمنوں میں سر فہرست خطرناک خبیث صیہونی نیٹ ورک ہے اور افسوس کا مقام ہے کہ بعض مغربی حکومتیں اور خاص طور پر امریکی انتظامیہ اسی نیٹ ورک کے زیر اثر ہے۔ اس نے شروع ہی سے اسلامی انقلاب اور اسلامی جمہوری نظام کی مخالفت کی۔ انقلاب لانے والے عوام کا کینہ اس کے دل میں بیٹھا ہوا ہے جو اب تک ختم نہیں ہوا ہے۔ اس مقابلہ آرائی میں ایک طرف ملت ایران ہے اور دوسری جانب ملت ایران سے کینہ رکھنے والی کچھ طاقتیں ہیں جو دشمنی و عناد پر تلی ہوئی ہیں۔ جب ہم میدان کا جائزہ لیتے ہیں تو ایک نظر ملت ایران پر ڈالتے ہیں اور اسے عزم و ارادے سے آراستہ پاتے ہیں، اس کے اندر امید کی روشن شعمیں دیکھتے ہیں، صلاحیتوں اور توانائیوں کے خروشاں چشمے دیکھتے ہیں، پرعزم اور محنتی نوجوان نسل کو آنکھوں کے سامنے پاتے ہیں۔ تمام میدانوں میں نوجوان نسل کی موجودگی اور شراکت نمایاں ہے۔ سائنس کے میدان میں بھی، جیسا کہ متعلقہ افراد اس کا اعتراف کرتے ہیں، ٹکنالوجی کے میدان میں بھی، دیگر گوناگوں سماجی میدانوں میں بھی، اور جب موقعہ پڑا تو مقدس دفاع کے میدان میں بھی، اور اس وقت مختلف انداز کی تیاریوں کے میدان میں بھی۔ آج یہ نعمتیں ملت ایران کے پاس موجود ہیں۔ بیس سالہ ترقیاتی منصوبہ بھی ہے اور پیشرفت کے لازمی وسائل و امکانات بھی دستیاب ہیں، قدرتی ذخائر بھی ہیں اور قیمتی معدنیات بھی موجود ہیں۔
ہمارے پاس جو بنیادی ذخائر موجود ہیں ان کی مقدار دنیا کے ذخائر کی اوسط شرح سے زیادہ ہے۔ میں بارہا یہ بات عرض کر چکا ہوں کہ ہماری آبادی دنیا کی کل آبادی کا تقریبا ایک فیصدی ہے اور ہمارا رقبہ بھی دنیا کے کل رقبے کا تقریبا ایک فیصدی ہی ہے، لیکن قدرتی ذخائر جو ہمارے پاس موجود ہیں وہ ایک فیصدی سے زیادہ ہیں۔ بعض ذخائر کے سلسلے میں تو ہم دنیا کے ملکوں میں پہلا مقام رکھتے ہیں۔ مثلا تیل اور گیس کے ذخائر کو یکجا طور پر دیکھا جائے تو ہمارا ملک دنیا میں سر فہرست ہے۔ یہ ہماری خصوصیتیں ہیں۔
ہماری آب و ہوا میں تنوع ہے۔ ہمارا ملک جغرافیائی لحاظ سے وسیع ملک ہے۔ ہماری ضرورت کی تمام اشیاء ہمارے پاس موجود ہیں، بہترین قدرتی دولت ہے، معدنیات ہیں، بڑے اچھے عوام ہیں، بہترین صلاحیتیں موجود ہیں، قوم سے گہری ہمدردی رکھنے والے حکام تینوں شعبوں (مجریہ، مقننہ، عدلیہ) میں موجود ہیں۔ مستعد، شجاع اور پوری طرح تیار مسلح فورسز ہمارے پاس ہیں، سنجیدہ اور انتہائی باصلاحیت مذہبی رہنما موجود ہیں، طلبہ سے آباد یونیورسٹیاں اور دینی مدارس موجود ہیں، چالیس لاکھ یونیورسٹی اسٹوڈنٹس اور اسی طرح اسکولوں اور کالجوں میں زیر تعلیم دسیوں لاکھ بچے۔ یہ ہمارے پاس موجود اہم وسائل ہیں۔ ہماری قوم کے اندر عزم و ارادہ بھی کم نہیں ہے۔
انقلاب کے آغاز سے اب تک ہم نے ارتقائی عمل طے کیا ہے۔ اس ارتقائی عمل کا ثمرہ دائمی طور پر ہمیں حاصل ہوتا رہا ہے۔ ان گزرے برسوں میں ہمیں جو کامیابیاں ملی ہیں وہ ہمارے ساتھ برتی جا رہی دشمنی کو مد نظر رکھا جائے تو بہت نمایاں ہیں۔ ہماری ترقی و پیشرفت کسی سے پوشیدہ نہیں ہے۔ بنیادی تنصیبات کے شعبے میں ملک نے قابل لحاظ ترقی کی ہے، عوامی خدمات کے شعبے میں ترقی حاصل ہوئی ہے، روحانیت و معنویت کے میدان میں بھی ترقی ملی ہے، سائنس و ٹکنالوجی کے شعبے میں بھی یہی عالم ہے۔ ہمارے ملک کے اندر جو نمایاں خصوصیات ہیں ان میں سر فہرست ملک کا سیاسی استحکام ہے۔ مختلف حکومتیں تشکیل پائیں، جن کے الگ الگ سیاسی رجحانات و میلانات تھے، لیکن ملک کا ثبات و استحکام اوائل انقلاب سے تا حال ہمیشہ قائم رہا اور وطن عزیز بلند اہداف کی جانب رواں دواں رہا۔ جماعتی اور سیاسی اختلافات اور تنازعات سے ملک کا سیاسی استحکام نابود نہیں ہونے پایا، یہ بڑی بنیادی خصوصیت ہے۔
ہمارے پاس اقتصادی بنیادیں، نافذ قوانین کے لحاظ سے بھی اور علمی و حقیقی تصویر کے لحاظ سے بھی، بہت نمایاں ہیں۔ آئین کی دفعہ چوالیس (نجکاری سے متعلق دفعہ) کے تحت وضع کی گئی پالیسیاں بہترین قانونی بنیاد اور فریم ورک کا درجہ رکھتی ہیں۔ مواصلاتی بنیادیں، نقل و حمل، شاہراہیں، ریل اور فضائی ٹرانسپورٹ کا انفراسٹرکچر، بجلی گھر، ڈیم، یہ سارے وہ کام ہیں جو انقلاب کے اوائل سے لیکر اب تک مستقل بنیادوں پر انجام پاتے رہے ہیں۔ تقریبا یہ ساری کامیابیاں ملک کے با استعداد اور با لیاقت نوجوانوں کی محنتوں سے حاصل ہوئی ہیں۔ یہ معمولی کامیابیاں نہیں ہیں جو ہمیں حاصل ہو چکی ہیں۔
ہمارا ایک اہم ترین سرمایہ یہی تعلیم یافتہ نوجوان نسل ہے۔ تعلیم یافتہ نوجوان نسل کے پاس شجاعت بھی ہوتی ہے، امید و نشاط کا جذبہ بھی ہوتا ہے اور آگے بڑھنے کی لگن بھی ہوتی ہے۔ میں ضمنی طور پر یہ بات بھی عرض کرتا چلوں کہ ایک غلطی جو ہم سے سرزد ہوئی ہے، جس میں خود میں بھی شریک ہوں، یہ ہے کہ خاندانی منصوبہ بندی کے منصوبے پر عملدرآمد کا سلسلہ انیس سو نوے کے عشرے کے وسط سے روک دیا جانا چاہئے تھا۔ ہم نے اسے نہیں روکا، یہ ہم سے غلطی ہوئی۔ میں نے عرض کیا کہ اس غلطی میں ملک کے حکام شریک ہیں اور خود یہ حقیر بھی اس میں شامل ہے۔ اللہ تعالی اور تاریخ ہمیں معاف کرے! نوجوان نسل کی حفاظت ہونا چاہئے! آج ہمارے پاس جو نوجوان نسل ہے اگرہم آئندہ دس سال، بیس سال اور اس کے بعد کے مراحل و ادوار میں نوجوان نسل کی اسی تعداد کو قائم رکھنے میں کامیاب ہو جائیں تو وطن عزیز کی تمام مشکلات کا ازالہ ہو جائے گا۔ نوجوان نسل کے اندر جو جوش و جذبہ ہوتا ہے، جو شوق و تجسس ہوتا ہے اور ایرانیوں میں جو صلاحیت پائی جاتی ہے اس کی وجہ سے ہمارے سامنے پیشرفت کے راستے کی مشکلات باقی نہیں رہیں گی۔
البتہ کچھ مشکلات بھی موجود ہیں جن کی طرف میں اشارہ کروں گا۔ کچھ مشکلات ہیں ملکی سطح کی اور کچھ علاقائی سطح کی۔ ان میں سب سے اہم مسئلہ گرانی اور روزگار کا مسئلہ ہے۔ یہ عوام کی بڑی مشکلات ہیں، یہ کسی ایک خطے میں نہیں بلکہ پورے ملک میں ہیں۔ میرے سفر سے پہلے دوستوں نے یہاں عوام سے مشکلات کے بارے میں استفسار کیا تو نتیجہ یہی نکلا کہ یہاں بھی وہی مشکلات ہیں جو دیگر خطوں میں پائی جاتی ہیں۔ گرانی اور بے روزگاری سب سے بنیادی تشویش ہے۔ یہ مشکلات بیشک موجود ہیں لیکن یہ ایسی مشکلات نہیں ہیں جنہیں ہماری یہ قوم اور ہمارے حکام حل کرنے سے قاصر ہوں۔
انقلاب کے ان تینتیس برسوں میں اس سے بڑے بڑے خطرات اور مشکلات کا سامنا ہوا اور ملک ان خطرات کی آنکھوں میں آنکھیں ڈال کر آگے بڑھتا رہا۔ دشمنوں نے آگ لگا دینے کی بڑی کوششیں کیں لیکن وہ اپنا مقصود حاصل نہ کر سکے۔ سب سے پہلے تو انقلاب کی فتح کے انہی ابتدائی مہینوں میں ملک بھر میں مختلف قومیتوں کو ورغلانے اور مشتعل کرنے کی سازش ہوئی۔ ہمارے ملک میں مختلف قومیتیں زندگی بسر کرتی ہیں۔ یہ کوشش کی گئی کہ ان قومیتوں کو ایک دوسرے سے دست و گریباں کر دیں۔ آپ کے اسی علاقے میں کمیونسٹوں کے ایک گروہ نے جسے دین اور وطن عزیز سے ذرہ برابر بھی دلچسپی نہیں تھی شریف و نجیب ترکمن قومیت کے لوگوں کو انقلاب مخالف بنانے کی کوشش کی۔ اس گروہ کا مقابلہ کس نے کیا؟ سب سے پہلے تو اسی شریف و نجیب ترکمن قوم کے افراد مقابلے کے لئے اٹھ کھڑے ہوئے۔ ترکمن علمائے کرام نے جن میں بعض انتقال فرما چکے ہیں اور بعض بحمد اللہ بقید حیات ہیں، اس گروہ کو للکارا۔ ملک کے دیگر علاقوں کے نوجوان بھی، یہاں بھی اور دوسرے خطوں میں بھی اٹھ کھڑے ہوئے۔ انہیں ورغلانے کی کوشش کی جا رہی تھی، آگ لگائی جاتی تھی اور پھر آگ کو ہوا دی جاتی تھی، اختلاف کی اس آگ کا دائرہ وسیع سے وسیع تر کرنے کی کوشش کی جاتی تھی لیکن ملت ایران نے اور خاص طور پر انہیں افراد نے، جنہیں مذکورہ گروہ اسلامی انقلاب کے مقابل لا کھڑا کرنا چاہتا تھا، فتنے کی اس آگ کو خاموش کر دیا۔ کردستان کے علاقے میں بھی خود کردوں نے، مسلمان کرد جوانوں نے، صاحب ایمان کرد علما نے آگے بڑھ کر اختلاف کی آگ بجھائی۔ دوسرے علاقوں میں بھی یہی عمل دہرایا گیا۔ یہ سب سے پہلی مشکل تھی جو سامنے آئی۔ اس کے بعد مسلط کردہ جنگ شروع ہو گئی۔ آٹھ سال تک جنگ کوئی مذاق ہے؟ انقلاب کو اکھاڑ پھینکنے کی کوشش کی گئی، اسے جھکا دینے کی کوشش کی گئی، لیکن ساری کوششیں لاحاصل رہیں۔ ملت ایران اس موڑ سے بھی بحفاظت گزر گئی۔
اس کے بعد پابندیوں کا مسئلہ پیش آیا۔ آج ہمارے دشمن، نشریاتی ادارے اور انہی کے سر میں بولنے والے کچھ دیگر افراد پابندیوں کے موضوع کو بہت بڑھا چڑھا کر پیش کرتے ہیں، بڑی مبالغہ آرائي کرتے ہیں۔ پابندیاں آج اور کل کی چیز نہیں ہیں۔ شروع سے ہی پابندیوں کا سامنا رہا ہے۔ البتہ انہوں نے ان میں شدت پیدا کی لیکن کوئی نتیجہ نہیں نکلا، بڑی تدبیریں سوچیں ان کا بھی کوئی اثر نہیں ہوا۔ پابندیاں شروع سے ہی لگی ہوئی ہیں۔ آج ہمارے دشمنوں نے خواہ وہ امریکا ہو یا بعض یورپی حکومتیں، پابندیوں کو جوہری توانائی کے مسئلے سے نتھی کر دیا ہے جبکہ یہ ان کا کھلا ہوا جھوٹ ہے۔ جس زمانے میں انہوں نے پابندیاں شروع کی تھیں، ملک میں ایٹمی توانائی نہیں تھی اور اس کا کوئی ذکر تک نہیں تھا۔ تو ملت ایران سے ان کی جھلاہٹ اور ان کے ان معاندانہ فیصلوں کی وجہ ملت ایران کی سربلندی و سرفرازی ہے۔ یہ خود مختاری کا جذبہ، یہ خود شناسی کی خصوصیت اور خود سپردگی سے انکار کی جرئت جو اسلام کی برکت سے اور قرآن کی برکت سے ملت ایران کے اندر پیدا ہوئی ہے، یہی دشمنوں کی ناراضگی کی وجہ ہے۔ یہی وجہ ہے کہ وہ اسلام کے دشمن بن گئے ہیں، یہی وجہ ہے کہ وہ پیغمبر اسلام کی شان میں گستاخیاں کر رہے ہیں۔ انہیں معلوم ہو گیا ہے کہ جب کسی ملک میں اسلام اپنی جڑیں پھیلا لیتا ہے تو اس ملک میں خود مختاری کا جذبہ اس طرح پروان چڑھتا ہے کہ پھر اسے کوئی دبانے کی جرئت نہیں کر سکتا۔ وہ دنیا کے ملکوں میں کمزور اور زبوں حال افراد کو اقتدار میں پہنچاتے ہیں یا بطور حاکم منصوب کر دیتے ہیں تا کہ یہ حکمراں ان کے بندہ بے دام بنے رہیں۔ لیکن ہمارے وطن عزیز جیسے ملک میں جہاں عوام خود اپنے عہدیداروں کا انتخاب کرتے ہیں، جہاں ہر شعبے میں عوام کی شراکت اور کردار بالکل نمایاں رہتا ہے وہاں یہ دشمن کیا کر سکتے ہیں؟ صاحب ایمان عوام، اسلامی اصولوں کے پابند عوام، اسلام سے جوش و جذبہ حاصل کرنے والے عوام ہرگز دبنے یا پسپا ہونے پر تیار نہیں ہوتے، یہی وجہ ہے کہ یہ طاقتیں چراغ پا رہتی ہیں۔ آج وہ نیوکلیئر انرجی کی بات کرتی ہیں اور یہ تاثر دینا چاہتی ہیں کہ اگر ملت ایران جوہری توانائی سے صرف نظر کر لے تو پابندیاں اٹھا لی جائیں گی۔ جبکہ یہ سراسر جھوٹ ہے۔ وہ اپنے بغض و کینے کی وجہ سے نامعقول اور غیر منطقی پابندیاں عائد کرتے ہیں۔ ان پابندیوں کو جب بھی کوئی عقلمند اور انصاف پسند انسان دیکھتا ہے تو یہی نتیجہ اخذ کرتا ہے کہ یہ بالکل نامعقول اور در حقیقت درندگی کی کارروائی ہے۔ یہ ایک قوم کے خلاف باقاعدہ جنگ ہے۔ البتہ اس جنگ میں بھی ملت ایران توفیق الہی سے دشمنوں پر غالب آئے گی۔
بیشک وہ مسائل و مشکلات ضرور پیدا کر دیتے ہیں اور (اندرون ملک) بعض غیر دانشمندانہ اقدامات کے باعث ان مشکلات میں اضافہ بھی ہوتا ہے، یہ سب کچھ ہے۔ لیکن یہ ایسے مسائل نہیں ہیں جنہیں حل کرنے سے اسلامی جمہوریہ قاصر ہو۔ اللہ کی مدد سے ایرانی قوم ان تمام مشکلات کو عبور کر جائے گی۔ ملت ایران اور ملک کے حکام نے اس سے زیادہ بڑی اور سخت مشکلات کو برطرف کیا ہے۔ یہ تو کچھ بھی نہیں ہیں۔ ذرا سی کوئی مشکل پیدا ہوئی دشمن شادیانے بجانے لگتے ہیں۔ انہی چند دنوں کے دوران جب زر مبادلہ اور ریال کی قیمتوں میں نشیب و فراز دیکھنے میں آیا، ان کی خبر رساں ایجنسیوں میں یہی خبر شہ سرخی کے طور پر نظر آتی تھی، دشمن کھلے عام بغلیں بجا رہے تھے۔ انہوں نے سفارتی آداب و متانت کو بھی بالائے طاق رکھ دیا، بالکل بچکانہ اور کودکانہ انداز میں خوش ہو رہے تھے کہ ایرانی عوام کے سامنے مشکلات کھڑی ہو گئی ہیں، اسلامی جمہوریہ کو ہم نے مشکل میں ڈال دیا ہے، یہ باتیں وہ کھلے عام کہتے ہیں! تہران کی دو سڑکوں پر مٹھی بھر افراد نے دو تین گھنٹے آکر چند کوڑے دانوں کو آگ کیا لگا دی، سمندر پار ان لوگوں کی خوشی کی انتہا نہ رہی کہ ہاں آشوب برپا ہو گیا ہے۔ ہماری حالت خراب ہے یا آپ کی؟ تقریبا ایک سال ہونے کو آیا یورپ کے اہم ممالک کی سڑکیں شب و روز مظاہروں کی تصویر بنی ہوئی ہیں۔ فرانس میں احتجاج ہو رہا ہے، اٹلی میں مظاہرے ہو رہے ہیں، اسپین میں ریلیاں نکل رہی ہیں، برطانیہ میں جلوس نکالے جا رہے ہیں، یونان میں عوام سڑکوں پر جمع ہیں۔ آپ کی مشکل بدرجہا پیچیدہ اور لا ینحل ہے۔ آپ کی معیشت جمود کا شکار ہو گئی ہے اور آپ خوش ہو رہے ہیں کہ ایران کی معیشت کمزور ہو رہی ہے؟! بدبختی کا شکار آپ ہیں، جمود، انہدام اور زوال کا شکار آپ ہیں، اسلامی جمہوریہ ان مشکلات سے زیر ہونے والی نہیں ہے۔
آج بنیادی مشکلات خود مغربی ممالک کے دامنگیر ہیں۔ آج امریکا کے صدارتی انتخابات کا ایک اہم ایشو اقتصادی مشکلات ہیں، عوام لاچارگی کا شکار ہیں، مشکلات سے دست و گریباں ہیں۔ کمزور طبقے کچل کر رہ گئے ہیں۔ ننانوے فیصدی کی تحریک کی جو بات سامنے آئی ہے یہ عین حقیقت ہے۔ البتہ اس تحریک کو کچلا جا رہا ہے۔ اقتصادی بحران سے دوچار وہ خود ہیں اور ہمارے یہاں معمولی سی چیز پر بغلیں بجا رہے ہیں۔
انہیں معلوم ہونا چاہئے کہ فضل الہی سے اسلامی جمہوریہ ان تمام مشکلات پر غالب آ جائے گی اور ملت ایران کو شکست دینے کی حسرت ان کے دل میں ہی رہ جائے گی۔ اللہ کی نصرت و مدد سے، عوام کے ہوشیاری و دانشمندی اور حکام کی مدبرانہ کوششوں سے مشکلات برطرف ہو جائیں گی۔ عوام الناس کا بھی فریضہ ہے، حکام کا بھی فریضہ ہے، سب کو اپنے اپنے فریضے پر عمل کرنا چاہئے۔ جب ہم اپنے فریضے پورے کریں گے تو تمام امور بحسن و خوبی آگے بڑھیں گے۔ عوام الناس کی ہوشیاری و بیداری کا بڑا اہم کردار ہے۔ آپ غور کیجئے! تہران میں کچھ لوگوں نے بازار کے تجار کے نام پر سڑکوں پے آکر آشوب برپا کیا، محترم تاجر برادری نے فورا موقعہ شناسی کا ثبوت دیتے ہوئے ایک بیان جاری کرکے اعلان کر دیا کہ یہ افراد جھوٹ بول رہے ہیں۔ تاجر برادری سے ان کا تعلق نہیں ہے! یہ بہت مستحسن اقدام تھا۔ اگر عوام الناس کے مختلف طبقات کی ہوشیاری اور موقعہ شناسی بروقت کام کر جائے تو اس کی بڑی قیمت ہے۔ یہ بڑا اہم اقدام تھا جو انہوں نے انجام دیا۔ سنہ دو ہزار نو کے ( صدارتی انتخابات کے بعد رونما ہونے والے) فتنے کے سلسلے میں بھی میرا موقف یہی ہے۔ سنہ دو ہزار نو کے فتنے میں یہ ہوا کہ پرشکوہ انتخابات کے چند روز بعد کچھ لوگوں نے سامنے آکر اعتراض کیا، جبکہ کچھ لوگوں نے اس موقعہ کا فائدہ اٹھایا، ہتھیار اٹھا لیا اور آشوب و کشیدگی کا ماحول پیدا کر دیا، بسیج (رضاکار فورس) کی چھاونی پر فائرنگ کر دی۔ ہمارا موقف یہ تھا کہ وہ افراد جن کے نام پر یہ سارا کارنامہ انجام پا رہا تھا فورا اعلامیہ جاری کرتے اور اپنی بیزاری کا اعلان کرتے، دو ٹوک الفاظ میں کہہ دیتے کہ ان افراد کا ہم سے کچھ لینا دینا نہیں ہے۔ لیکن انہوں نے ایسا نہیں کیا۔ اگر انہوں نے یہ دانشندانہ اقدام انجام دے دیا ہوتا تو فتنے کی بہت جلد بیخ کنی ہو جاتی اور بعد میں پیش آنے والے متعدد مسائل پیش نہ آتے۔ یہ ہوشیاری، موقعہ شناسی، ہر ہر لمحے کا محاسبہ، بہت اہم اور نمایاں خصوصیت ہے، ہمارے عوام کو تمام امور میں ہوشیار رہنا چاہئے، جیسے ہی دشمن کی سازش اور معاندانہ حرکت نظر آئے اسی لمحہ محتاط ہو جائیں۔ یہ عوام الناس کی ذمہ داری ہے۔
ملک کے حکام کا جہاں تک تعلق ہے تو انہیں باہم متحد رہنے کی ضرورت ہے، دوستانہ ماحول قائم رکھنے کی ضرورت ہے، اچھی منصوبہ بندی کی ضرورت ہے، فرض شناسی اور فریضے کی ادائیگی ضروری ہے، غلطیوں اور کوتاہیوں کو ایک دوسرے کے سر ڈالنے سے گریز کریں، اپنی کارکردگی کے سلسلے میں آئینی حدود کی پاسداری کریں۔ ہمارے آئین میں نقص اور خامی نہیں ہے۔ اس میں پارلیمنٹ کا کردار واضح کر دیا گیا ہے، حکومت کا دائرہ کار معین ہے، صدر جمہوریہ کا کردار طے شدہ ہے، عدلیہ کا کردار معین ہے۔ سب کے اپنے اپنے فرائض ہیں اور سب کو ان پر عمل کرنا ہے۔ انہیں چاہئے کہ آپس میں دوستانہ ماحول رکھیں، ایک دوسرے سے تعاون کریں، ایک دوسرے کی آواز سے آواز ملانے کی کوشش کریں۔
«پس زبان همدلى خود ديگر است / همدلى از همزبانى بهتر است».
الحمد للہ اس سلسلے میں ہمیں کوئی مشکل در پیش نہیں ہے۔ ملک کے حکام جذبہ ہمدردی سے سرشار ہیں۔ ہم سب انسان ہیں، ہم سے کبھی غلطیاں بھی ہوتی ہیں، خطائیں سرزد ہوتی ہیں، لیکن ان غلطیوں کا تدارک کیا جا سکتا ہے۔ الحمد للہ حکام کے اندر دلسوزی ہے، تینوں شعبوں (عدلیہ، مقننہ، مجریہ) کے سربراہوں میں ان تینوں شعبوں کے محکمہ جاتی ڈھانچے میں، ہمدردانہ جذبے کی کمی نہیں ہے، اسلامی نظام کی سرنوشت سے دلچسپی اور لگاؤ کی کمی نہیں ہے، سب ہمدردی رکھتے ہیں، سب کو لگاؤ ہے، انشاء اللہ وہ امور کو آگے بڑھائیں گے، وہ سب بڑی محنت سے کام کر رہے ہیں۔
میری سفارش یہ ہے کہ ہمیں ہرگز یہ فراموش نہیں کرنا چاہئے کہ محنت، لگن، امید، صبر و پائیداری اور درست منصوبہ بندی اس راستے پر چلنے کی لازمی شرطیں ہیں جسے ہم نے چنا ہے۔ جس راستے پر ہم چل رہے ہیں وہ بڑا اہم راستہ ہے، ایسا راستہ ہے جو تاریخ عالم کو دگرگوں کر سکتا ہے، چنانچہ وہ علاقے کی تاریخ کو تبدیل کر رہا ہے، جس کا آپ خود مشاہدہ کر رہے ہیں۔ کون سوچ سکتا تھا کہ شمالی افریقا اور مغربی ایشیا کے اس حساس علاقے میں، اسی علاقے میں جسے یورپ والے مشرق وسطی کہنا زیادہ پسند کرتے ہیں، اتنے اہم تغیرات رونما ہوں گے؟ لیکن یہ واقعات رونما ہوئے اور ان کا سلسلہ بدستور جاری ہے۔ یہ واقعات جو رونما ہو رہے ہیں وہ مغرب اور خاص طور پر امریکا کے لئے ضرر رساں اور صیہونی حکومت کے لئے ایک بڑا خطرہ ہیں۔ صیہونی حکومت کے عہدیدار جو مہمل بیانی کر رہے ہیں اس کی اتنی اہمیت نہیں ہے کہ اس کا کوئی جواب دیا جائے۔ کچھ باتیں وہ کہہ رہے ہیں اور کچھ باتیں مغربی حکام بیان کر رہے ہیں۔ بنیادی طور پر ان میں امریکی اور ان کے مطیع افراد ہی ہیں، یورپی حکام کو زیادہ دلچسپی نہیں ہے۔ اس قضیئے میں امریکا کی معیت و ہمراہی یورپی حکومتوں کے لئے دانشمندانہ اور عاقلانہ فعل نہیں ہے۔ وہ اس معاملے میں خود کو امریکا پر قربان کر رہے ہیں، یہ ان کا احمقانہ فعل ہے۔ ہمارے عوام بہت سے یورپی ملکوں کے سلسلے میں کوئی بدگمانی نہیں رکھتے۔ فرانس، اٹلی اور اسپین کے سلسلے میں ہمارے برے تاثرات نہیں ہیں۔ بیشک برطانیہ کے سلسلے میں ہمارا تجربہ بہت خراب رہا ہے، ہم برطانیہ کو کہتے ہیں کہ خبیث برطانیہ لیکن دیگر یورپی ممالک کے سلسلے میں یہ تاثرات نہیں ہیں۔ تاہم وہ اب جو کام کر رہے ہیں یعنی امریکا کی پیروی جو ہماری نظر میں سراسر غیر دانشمندانہ فعل ہے، اس سے وہ ملت ایران کی دشمنی مول لے رہے ہیں، خود کو ایرانی عوام کی نظر میں نفرت انگیز بنا رہے ہیں۔
ہم اس موڑ کو بھی عبور کر لیں گے۔ ہماری قوم ایسی شجاع، توانا اور چابک دست قوم ہے کہ ان راستوں سے بآسانی گزر جائے گی۔ ہم تینتیس سال سے انہی مشکلات کا سامنا کرتے ہوئے اپنا سفر طے کر رہے ہیں، روز بروز ہمارے عضلات قوی تر ہوتے جا رہے ہیں، ہم زیادہ مستعد اور زیادہ تجربہ کار ہوتے جا رہے ہیں۔ ہم تعطل کا شکار ہونے والے نہیں ہیں، تعطل کا شکار تو آپ ہیں۔ آپ ملت ایران کی نفرت مول لیکر اپنی مشکلات میں اضافہ کر رہے ہیں۔ یہ آپ کی بہت بڑی غلطی ہے۔ ملت ایران اس مرحلے کو عبور کر جائے گی۔ البتہ اس کی لازمی شرط یہی ہے کہ قوم اور عوام کی استقامت، ان کا جذبہ عمل، ان کا ثبات، ان کی ہوشیاری، ان کی موقعہ شناسی، انقلاب کے بعد کے تمام ادوار کی مانند موجودہ دور میں بھی اسی طرح قائم رہے۔ حکام بھی اپنے فرائض پر عمل کریں۔ یہ یقین رکھنا چاہئے کہ جملہ امور عوام الناس کی مرضی و خواہش کے مطابق طے پائیں گے اور اقتصادی مشکلات کا ازالہ ہو جائے گا۔
البتہ آج سب سے بنیادی چیز قومی پیداوار کا مسئلہ ہے۔ تمام مشکلات کا بنیادی اور اصلی حل قومی پیداوار کا فروغ ہے، جس پر ہم نے اس سال کے نعرے میں بھی تاکید کی، قومی پیداوار، ایرانی سرمایہ اور کام۔ اس سے گرانی بھی دور ہو جائے گی، پیداوار میں اضافہ ہوگا، روزگار کے مواقع پیدا ہوں گے، بے روگاری دور ہوگی، قومی سرمایہ صحیح انداز میں استعمال ہوگا، قوم کے اندر اسغناء اور بے نیازی کا جذبہ پیدا ہوگا۔ مختلف سطح کے حکام کو چاہئے کہ جہاں تک ممکن ہو قومی پیداوار کو فروغ دینے کی کوشش کریں۔ البتہ بنیادی طور پر تو ہمارا خطاب اعلی رتبہ حکام سے ہی ہے، خواہ وہ پارلیمنٹ کے حکام ہوں یا مجریہ سے تعلق رکھتے ہیں لیکن صوبائی سطح کے حکام اور نچلی سطح کے عہدیداروں کو بھی اس پر توجہ دینے کی ضرورت ہے۔
دیگر صوبوں کی طرح اس صوبے میں بھی حکام کی توجہ عوام کی مشکلات کے ازالے پر مرکوز ہونا چاہئے۔ ان میں سر فہرست پیداوار کا موضوع اور مقامی وسائل کے بروئے کار لائے جانا کا مسئلہ ہے۔ یقینی طور پر اس صوبے میں پانی کی فراوانی، زرخیز زمین، زراعت کے لئے سازگار حالات، مویشیوں کی صنعت جس نے صوبے ہی نہیں بلکہ باہر کی ضروریات بھی پوری کی ہیں، صنعتوں کی موجودگی، بڑی صنعتیں موجود ہیں لہذا ضمنی اور ذیلی صنعتوں پر توجہ دی جا سکتی ہے، ان وسائل کو دیکھتے ہوئے روزگار، قومی پیداوار اور عوامے کے اندر امید و نشاط میں اضافہ کیا جا سکتا ہے۔ یہ ایسی چیزیں ہیں جن پر صوبے کے حکام کو توجہ دینے کی ضرورت ہے۔
میں اس دھوپ میں آپ برادران و خواہران عزیز کو اتنی دیر تک نہیں بٹھانا چاہتا تھا لیکن پھر بھی گفتگو طولانی ہو گئی۔ بہت سی باتیں ہیں، میں ابھی ساری باتیں بیان نہیں کر سکا ہوں۔ تاہم آئندہ چند دنوں تک میں آپ عزیزوں کا مہمان ہوں، مختلف جگہوں اور مواقع پر اپنے معروضات پیش کروں گا۔ نوجوانوں، علماء، علمی شعبے کے حکام، رضاکار فورس اور دیگر طبقات سے اپنی ملاقاتوں میں نیز بعض شہروں کے دوروں کے موقعے پر انشاء اللہ بہت سی باتیں بیان کروں گا۔ اللہ کی بارگاہ میں دعا ہے کہ وہ اپنی برکتیں آپ کے شامل حال فرمائے۔
پالنے والے! محمد و آل محمد کا صدقہ اس صوبے کے عوام پر اپنی برکتیں، اپنی رحمتیں اور اپنا فضل و کرم نازل فرما۔ پالنے والے! نوجوانوں کی حفاظت فرما! پالنے والے! دشمنوں کے ہاتھ منقطع کر دے! پالنے والے! محمد و آل محمد کا صدقہ ہمیں اس راستے پر ثابت قدم رکھ جو تیری خوشنودی اور تیرے اولیائے خاص کی رضامندی کا باعث ہے۔ ہمارے عزیز شہیدوں اور عظیم الشان امام خمینی رحمت اللہ علیہ کی روح مطہرہ کو اپنے اولیا کے ساتھ محشور فرما۔

1) من لا يحضره الفقيه، ج 3، ص 156
2) مذکورہ بالا ماخذ