یہ ترانہ حمید نے کہا تھا۔ شاید ایک مہینہ دو مہینہ یا اس سے کچھ کم وقت گزرا تھا اس ترانے کو کہے ہوئے اور اتنی سی مدت میں یہ ترانہ سنندج شہر میں ایک جوس بیچنے والے شخص کی زبان سے سنا گیا۔ کسی نے اس سے یہ ترانہ پڑھنے کے لئے نہیں کہا تھا۔ جناب فیض صاحب (3) کے بقول اسلامی نظام کا طرفدار (4) بھی نہیں تھا کہ اسے تلقین کی گئی ہو کہ یہ ترانہ پڑھو۔ نہیں، وہ یونہی خود بخود یہ اشعار پڑھ رہا تھا۔ یہ ہے ترانے کی خاصیت۔ ترانہ تازہ ہوا کی مانند، باد بہاری کی طرح گہرائی تک اتر جاتا ہے۔ اس کی ترویج کرنے کی ضرورت نہیں پڑتی۔ اس پر تقریظ لکھوانے کی ضرورت نہیں پڑتی، اس کے بارے میں اشعار کہلوانے کی ضرورت نہیں ہوتی۔ ترانہ اگر موزوں ہو گیا ہے تو اپنا اثر ضرور ڈالتا ہے۔ آج ہمارے پاس اس کی کمی ہے۔ مجھے لگتا ہے کہ آج ہمیں اس کی ضرورت ہے اور مرحوم حمید سبزواری رضوان اللہ علیہ اس میدان میں مثالیہ تھے۔ مجھے ٹھیک سے یاد نہیں ہے، جو اعداد و شمار مجھے دئے گئے ان کے مطابق تقریبا انھوں نے چار سو یا اس سے بھی زیادہ ترانے کہے۔ ان چیزوں کی بڑی قدر و قیمت ہوتی ہے۔ انھیں نظرانداز نہیں کیا جانا چاہئے۔
یہ جو میں نے ان اشعار کا ذکر کر دیا کہ جو جناب سیار صاحب اور جناب عرفان پور صاحب نے مشترکہ طور پر کہے تھے (5)، میں نے عرض کیا کہ یہ اشعار میں نے سنے تھے، وہ یہی اشعار تھے جن پر انقلاب مخالف غیر ملکی چینلوں نے رد عمل دکھایا اور اس کی بڑی مذمت کی۔ انھیں اس کام کی اہمیت کا فوری طور پر احساس ہو گیا۔ مجھے جہاں تک یاد ہے کہ فاکس نیوز کے بارے میں رپورٹ دی گئی تھی کہ اس نے بہت برا بھلا کہا تھا۔ ان اشعار کی مدد سے جو بڑا اچھا گیت تیار کیا گیا تھا جس کے مشمولات بہت اچھے تھے، اس سے وہ بہت برہم ہوئے تھے، بہت ناراض ہوئے تھے۔ لیکن خود ہمیں اس کی کوئی خبر نہیں۔ یعنی ہم نے ترویج کے لئے کچھ نہیں کیا۔ اچھے ترانے کی ہم نے ترویج نہیں کی۔ میری نظر میں ترانے کہنا بہت اچھا ہے۔ پھر اسے خوش اسلوبی سے گانا بہت اچھا ہے۔ البتہ الفاظ اور ترکیبوں کے بارے میں میری کچھ سفارشات ہیں جو بعد میں عرض کروں گا۔ اللہ کی رحمتیں نازل ہوں ہمارے عزیز شاعر حمید پر۔ اللہ کی مغفرت ان کے شامل حال ہو۔ جس کا ذکر ہوا وہ ان کی عظیم خدمات کا چھوٹا سا حصہ تھا، ان شاء اللہ یہ ان کے لئے زاد آخرت قرار پائے گا۔
میرے عزیزو! شاعر ملک کا سرمایہ ہے۔ ملک کا افتخار آمیز اور حد درجہ پسندیدہ سرمایہ شاعر ہے۔ یوں تو سارے ہی فنکار سرمایہ ہیں، لیکن شاعر کی منفرد خصوصیت ہے، اسی طرح شعر و شاعری کی فن و ہنر کی گوناگوں قسموں میں ایک الگ اہمیت ہے۔ ان خصوصیات کی وجہ سے سماج میں شاعر کا مقام بلند ہوتا ہے۔ یہ سرمایہ اور ذخیرہ ہے۔ یہ سرمایہ مشکل مواقع پر ملک کے کام آنا چاہئے۔ یہ بالکل واضح اور فطری سی بات ہے۔ جب بھی ملک کو ثقافتی میدان میں، سیاسی میدان میں، سماجی میدان میں، عوامی رابطوں کے میدان میں، سماجی رشتوں کے میدان میں یا غیر ملکی دشمن سے مقابلہ آرائی کے میدان میں، مدد کی ضرورت پڑے، تو یہ سرمایہ اور یہ پونجی بھی، قومی ترقیاتی فنڈ کی مانند جہاں ہم تیل کی آمدنی کا ایک حصہ رکھتے ہیں کہ ضرورت کے وقت اسے استعمال کریں گے، ملک کے کام آنا چاہئے۔ لہذا اگر ہمارے پاس ایسے اشعار ہوں جن میں ملک کو درپیش مسائل کے بارے میں کوئی موقف نہیں ہے، تو وہ ملک کے کام نہیں آئیں گے۔ ان میں موقف ہونا چاہئے۔
آپ جانتے ہیں کہ میں نے اسی نشست میں بارہا عرض کیا ہے کہ میں اس کا طرفدار نہیں کہ آپ جو بھی شعر کہیں اس میں موقف ضرور ہو یا سیاسی فرض شناسی کی عکاسی ضرور کی جائے، ایسا نہیں ہے، غزل کے اشعار اور عاشقانہ اشعار موزوں کرنے میں کوئی مضائقہ نہیں ہے۔ کیونکہ یہ بھی شاعر کے طبعی و فطری میلان کا جز ہے۔ وہ غزل کے اشعار کہے، کوئی حرج نہیں ہے، لیکن اسی تغزل میں بھی، اسی عشقیہ شاعری میں بھی ہدایت کی رمق ہونا چاہئے، انحراف و فساد کی رمق نہیں ہونا چاہئے۔ میرا مقصد یہ نہیں ہے کہ اگر آپ نے کوئی غزل کہی ہے تو سراپا سیاسی مسائل کا آئینہ بن جائے۔ نہیں، آپ اس طرح کر سکتے ہیں کہ دو تین اشعار میں آپ نے عشق و محبت کے اور جذباتی میلان کے مضامین باندھے، پھر نشتر کا کام کرنے والے دو شعر بھی شامل کر لیجئے۔ ہمارے اچھے شعرا نے ہمیشہ اسی نہج پر اشعار کہے ہیں۔ غزل کہی ہے تو اس میں کسی حساس مسئلے اور نکتے کو بھی ایک دو اشعار میں باندھ دیا ہے۔ شاعر کے اشعار، زندہ اشعار ہونے چاہئے۔
ایک اور مسئلہ ان اشعار کا ہے جو ملک کے معروضی مسائل کے بارے میں کہے جاتے ہیں۔ خوش قسمتی سے ہمارے اس دور میں ایسے شعرا کی تعداد کم نہیں ہے جن سے ہم جاریہ مسائل کے بارے میں موقف کے حامل اشعار سنتے ہیں۔ دس پندرہ سال قبل کی نسبت آج ہم اس پہلو سے کافی آگے اور بہتر حالت میں ہیں۔ لیکن ان کی ترویج نہیں ہوتی۔ مثال کے طور پر شہید غوطہ خوروں کے بارے میں یا حرم اہل بیت کا دفاع کرنے والوں کے بارے میں کچھ اشعار کہے گئے، جیسے یہی اشعار جو جناب (6) نے حرم اہل بیت کے محافظین کے بارے میں سنائے، یہ بہت اچھے اشعار ہیں۔ ان کی بڑی نمایاں حیثیت ہے، ان کی ترویج کیوں نہیں ہوتی؟ میرا سوال یہ ہے کہ ان کی ترویج و تشہیر کا کیا طریقہ ہے؟ یا مثال کے طور پر شیخ زکزاکی (7) کے بارے میں اشعار لکھے گئے۔ شیخ زکزاکی اپنے راستے اور مہم کے تعلق سے پرعزم، شجاع اور مظلوم انسان ہیں جنھیں حملے کا نشانہ بنایا گيا، ان سے انتقام لیا گیا۔ اب مثال کے طور پر اگر ہم اس نظم کا ترجمہ کریں اور اسے کچھ اداروں کو ارسال کریں جہاں ان کی شہرت ہے تو پھر دیکھئے کہ اس کا اثر کتنا بڑھ جاتا ہے۔ لوگوں کو کتنا حوصلہ ملے گا؟! ہم یہ کام نہیں کرتے۔ اس میدان میں واقعی ہم سے کوتاہی ہو جاتی ہے۔ یا فلسطین کے مسئلے میں، یمن کے مسئلے میں، بحرین وغیرہ کے معاملات میں یا امریکا کی خیانتوں کے مسئلے میں؛ امریکیوں نے جامع مشترکہ ایکشن پلان کے معاملے میں کم خیانتیں نہیں کی ہیں۔ انھیں بیان کرنا چاہئے۔ یہ صرف سیاسی رہنماؤں کی ذمہ داری نہیں ہے کہ وہی بیان کرتے رہیں، سیاسی رہنماؤں سے زیادہ بہتر ہے فنکار ان حقائق کو بیان کریں۔ فنون میں سب سے آسان، پررونق، تیز رفتار اور جو دسترسی میں بھی ہے شعر ہے۔ یہ مضامین بیان کئے جانے چاہئے، ان حقائق کو منعکس کیا جانا چاہئے، رائے عامہ تک منتقل کیا جانا چاہئے۔ اسی طرح مقدس دفاع کے موضوع پر۔ میں اپنے ان برادران عزیز کا تہہ دل سے شکریہ ادا کرنا چاہوں گا جنھوں نے ہماری اس شب کی نشست میں بحمد اللہ ان موضوعات سے متعلق اشعار پیش کئے۔ بڑا اچھا اقدام ہے، یہ سلسلہ جاری رہنا چاہئے، اس میں وسعت آنی چاہئے، اس کی ترویج ہونا چاہئے۔ میں دیکھتا ہوں کہ بعض جگہوں پر اس کے برخلاف عمل ہوتا ہے۔
کسی ایسے فنکار کو بڑھ چڑھ کر خراج عقیدت پیش کیا جاتا ہے جس نے ان اڑتیس برسوں میں کبھی بھی اسلامی انقلاب یا اسلام سے متعلق مفاہیم و مضامین کی جانب ذرہ برابر رجحان و میلان ظاہر نہیں کیا۔ جبکہ اس فنکار کی کوئی قدردانی نہیں کی جاتی جس نے اپنی پوری عمر اسی راہ میں بسر کی، اس کی جانب کوئی اعتنا نہیں کیا جاتا۔ یہ بہت غلط طریقہ ہے۔ ہمارے عہدیداران کو چاہئے کہ اس مسئلے کی جانب توجہ دیں۔ تو ہمارا موقف یہ ہے کہ ہم اپنی شاعری کو، اپنے اشعار کو زندہ اور گرمی حیات سے سرشار بنائیں، موقف کا حامل بنائیں اور پھر ان اشعار کی ترویج کریں، متعلقہ لوگ ترویج کریں۔ قومی نشریاتی ادارہ اس کی ترویج کرے۔ سرکاری و غیر سرکاری ادارے ترویج کریں۔
خوشی کا مقام ہے کہ جو افراد مصروف کار ہیں، واقعی بحسن و خوبی اپنی ذمہ داریاں پوری کر رہے ہیں، لیکن ان کا دائرہ کار اور ان کے وسائل محدود ہیں، وسائل کو وسعت دینا چاہئے تاکہ وہ آسانی سے کام کر سکیں۔ اس میدان میں بھی جس کا میں نے ذکر کیا اور شعرا کی تربیت کے میدان میں بھی کام کریں، خوش قسمتی سے اس میدان میں بھی کچھ کام ہو رہے ہیں۔
شاعری کی کچھ صنفیں ایسی ہیں جو عوام کے درمیان بہت زیادہ رائج ہیں، جیسے نوحہ، مرثیہ وغیرہ۔ نوحے کا اثر بہت زیادہ ہے۔ اس کے اندر گہری تاثیر ہے۔ البتہ اگر اس نوحے کے اندر اچھے مضمون کو سمویا گیا ہو۔ آپ دیکھئے کہ عاشور کے دن، اسی طرح عزاداری کی دیگر مناسبتوں پر کروڑوں لوگ جن میں اکثر و بیشتر نوجوان ہوتے ہیں، نوحہ خواں کے اشعار سنتے ہیں۔ نوحے کے اشعار اور پیش کرنے کے انداز سے ان کے اندر ہیجان برپا ہو جاتا ہے۔ سینہ زنی کرتے ہیں، گریہ کرتے ہیں، دینی امور کے تعلق سے ان کے جذبات و احساسات کی حرارت بڑھتی ہے۔ یہ بڑا اچھا موقع ہے۔ ہم اس موقع سے استفادہ کر سکتے ہیں۔ ملک کو اس سے استفادہ کرنا چاہئے، اسلام کو اس سے استفادہ کرنا چاہئے، اسلامی نظام کو چاہئے کہ اس سے استفادہ کرے۔ میں نوحہ خواں حضرات کو متنبہ کر چکا ہوں اور آپ شعرائے کرام کی توجہ بھی اس نکتے کی جانب مبذول کرانا چاہتا ہوں کہ مثال کے طور پر انقلابی تحریک کے دوران محرم کے ایام میں مجھے یاد ہے کہ جہرم کے علاقے میں ہونے والے ماتم کی کیسٹ مجھے لاکر لوگوں نے دی۔ اس وقت ہم مشہد میں تھے۔ وہ حد درجہ اثر انگیز تھی۔ ایک تو شعر، الفاظ، معانی اور ترکیبوں کے اعتبار سے اس میں بڑی کشش تھی، دوسرے آواز بہت اچھی تھی، تیسرے انداز بڑا ہیجان انگیز، متحرک کر دینے والا اور رہنما انداز تھا۔ واقعی بڑی اہم چیز تھی۔ اس کے بعد یزد سے ایک کیسیٹ آئی۔ ان دونوں شہروں کا ماتم مجھے یاد ہے، دوسری کسی جگہ میں نے نہیں دیکھا۔ اس زمانے میں انقلابی تحریک کے جو مسائل تھے انھیں بھی نوحے کے قالب میں ڈھالا گیا تھا۔ یہی چیز ہم نے مقدس دفاع کے دوران بھی دیکھی۔ جو نوحے جناب آہنگران نے پڑھے اور وہ شاعر جو ان کے لئے اشعار کہتے تھے اللہ ان پر رحمت کرے جناب معلمی مرحوم، ان اشعار میں درس ہوتا تھا۔ ہمیں اس سلسلے میں سنجیدگی سے کام کرنا چاہئے۔ البتہ نوحے کے اشعار کی الگ خصوصیات ہوتی ہیں۔ یعنی الفاظ کے اعتبار سے، بندش الفاظ کے لحاظ سے، شعری سانچے کے اعتبار سے اس کی الگ خصوصیات ہوتی ہیں جن کا نوحے میں ہونا ضروری ہے تاکہ نوحہ خواں اسے بآسانی پیش کر سکے۔ تاہم میری گزارش ہے نوحہ خواں حضرات سے، مرثیہ خواں حضرات سے کہ وہ توجہ دیں؛ اس قسم کے اشعار کا مطالبہ کریں، قبول کریں، انھیں استعمال کریں۔ آپ شعرائے کرام بھی اس سلسلے میں جہاں تک ممکن ہے کوشش کیجئے۔
ایک صاحب نے (8)، کچھ اشعار ابھی پڑھے جس کا مضمون یہ تھا کہ اگر آپ تلوار کھینچیں تو وہ سینے بہت زیادہ ہیں جو آپ کے سامنے آ جائیں گے اور دشمن کے مقابلے میں آپ کی ڈھال بن جائیں گے۔ میں نے کہا کہ ہم نے تلوار کھینچ لی ہے، مصروف پیکار ہیں، ہم داہنے بائيں حملے بھی کر رہے ہیں، مگر آج شمشیر کی شکل، میدان جنگ کی نوعیت شروع کے برسوں سے الگ ہے۔ ہم نرم جنگ میں مصروف ہیں۔ ہم سیاسی جنگ میں مصروف ہیں، ثقافتی جنگ کر رہے ہیں، اثر و نفوذ اور سیکورٹی کی جنگ لڑ رہے ہیں۔ فکروں اور ارادوں کا تصادم ہو رہا ہے۔ آج ہمیں موثر وسائل اور ہتھیاروں کی شدید ضرورت ہے۔ ان موثر ہتھیاروں میں میری نظر میں شعر کا بڑا اہم مقام ہے، اس پر آپ کو توجہ دینا ہے۔
میرا یہ خیال ہے کہ شعر کے میدان میں بہت کچھ کرنا باقی ہے۔ جیسا کہ ہم نے عرض کیا؛ ایک کام ترجمے کا ہے۔ جناب نے (9) آج مجھے بتایا کہ آپ نے اردو زبان میں کچھ اشعار کا منظوم ترجمہ کیا ہے۔ بہت اچھا کام ہے، یہ ایک ضروری کام ہے۔ مختلف پس منظر اور موضوعات سے متعلق فارسی اشعار کا مختلف زبانوں میں ترجمہ ہونا چاہئے۔ مثال کے طور پر فلسطین کے موضوع پر اشعار، مقدس دفاع سے متعلق اشعار، خواتین کے موضوع پر اشعار، علاقائی مسائل کے بارے میں اشعار، یمن وغیرہ سے متعلق اشعار نظم کئے جائیں اور ان کا ترجمہ ہو؛ عربی، اردو، انگریزی اور دیگر زبانوں میں۔ اچھا ترجمہ ہو اور پھر اسے شائع کیا جائے، ملک سے باہر اس کی پیشکش ہو۔ مثال کے طور پر 'فارسی شاعری میں فلسطین' ایک موضوع ہے۔ یا یہ موضوع؛ آٹھ سالہ ایران عراق جنگ کی سرگزشت یا کیا ماجرا تھا؟ بہت سے لوگوں کو اس کے بارے میں معلوم نہیں ہے۔ عراقی ڈاکٹر صاحبہ نے ہمارے ان عزیز دوست سے کہا تھا کہ صدام کے جانے کے بعد میں نے ایران کا پہلا اور دوسرا سفر کیا تو جب بھی کسی ایرانی کو دیکھتی مجھے یہ محسوس ہوتا کہ اسی نے جنگ میں مارے جانے والے میرے دونوں بھائیوں کا قتل کیا ہوگا۔ میری یہ سوچ تھی۔ میرے دل میں غم و اندوہ تھا۔ اس کے آگے انھوں نے کہا کہ 'پھر میں نے سلیمانی (10) کو دیکھا۔ جب میں نے دیکھا کہ سلیمانی ہمارے ملک میں آکر اس طرح جانفشانی کر رہے ہیں تو میری سوچ بالکل بدل گئی۔ یہ آخری حصہ بیان کرنے کا میرا ارادہ نہیں تھا۔ میں اس پہلے حصے کو بیان کرنا چاہتا تھا۔ یعنی ایک عراقی نوجوان، ایک عراقی خاتون، ایک عراقی ماں کو بھی نہیں معلوم کہ حقیقت ماجرا کیا ہے۔ نہیں پتہ کہ اصل میں کیا ہوا تھا؟ ہم تو اپنے گھر میں بیٹھے تھے، طیارے آئے اور ہمارے اوپر بمباری کرکے چلے گئے۔ اب ہم کیا کریں؟ ہاتھ پر ہاتھ رکھے بیٹھے رہیں؟ یہ طیارے آئے، ہماری سرحدوں کو عبور کرکے کئی ہزار کلومیٹر اندر کے علاقے کو نشانہ بنایا، اس کے جواب میں ہمیں کیا کرنا چاہئے تھا؟ یونہی بیٹھے رہتے کہ آگے بڑھتے چلے آئیں، یا ہمیں جاکر دفاعی کارروائی کرنی چاہئے تھی؟ ہم نے دفاع کیا۔ یہ عین حقیقت ہے۔ عراقی نوجوان، عراقی ماں، عراقی یتیم، عراقی بہن کو یہ حقیقت کیوں نہ بتائی جائے؟ دوسروں کے سامنے ساری حقیقت کیوں نہ لائی جائے؟ یہ کام شعر کی مدد سے انجام دیا جا سکتا ہے۔
ایک اور نکتہ یہ ہے کہ ہمارے عزیز شعرا نے واقعی اچھی ترقی کی ہے، اچھی پیشرفت دیکھنے میں آ رہی ہے۔ آج جب میں دیکھتا ہوں تو نوجوانوں کے درمیان بھی، اوسط عمر کے افراد کے درمیان بھی، شعری ارتقاء نظر آتا ہے۔ یعنی ملک میں صنف شعر کو ارتقاء ملا ہے اور مجموعی طور پر محسوس ہوتا ہے کہ ہماری شاعری ایک قدم آگے بڑھی ہے۔ البتہ اس کا یہ مطلب نہیں کہ ہم اس بلندی پر پہنچ چکے ہیں جو ہماری آخری منزل ہے اور اب مزید آگے جانے کی ضرورت نہیں ہے۔ میں یہ بات بار بار کہتا رہا ہوں اور آج ایک بار پھر دہراتا ہوں کہ اپنی شعری مشاقی اور شعری ارتقائی عمل ہرگز رکنے نہ دیجئے۔ یعنی آپ آج اچھے اشعار کہہ رہے ہیں، جب آپ یہ اشعار پڑھتے ہیں تو ہمیں بہت پسند آتے ہیں، ہم محظوظ ہوتے ہیں، داد بھی دیتے ہیں، لیکن اس کا یہ مطلب نہیں ہے کہ شعر بام ثریا پر پہنچ چکا ہے۔ نہیں، بے شک شعر اچھا ہے، لیکن ہم چاہتے کہ آپ کا شعر بلندیوں کو چھوئے، ہماری یہ کوشش ہے۔ اس ہدف کے حصول کا ایک ذریعہ الفاظ ہیں، پرکشش، اچھے اور مانوس الفاظ۔ کبھی کبھی دیکھنے میں آتا ہے کہ شعر اچھا ہے، لیکن الفاظ میں وہ پختگی اور الفاظ کا برمحل استعمال نہیں ہے۔ یہ اچھی بات نہیں ہے۔ اگر شعر میں اچھے الفاظ ہوں تو سننے والے کو اچھا لگتا ہے۔
شعر کا ارتقائی عمل جاری رہنا چاہئے، شعر کے ارتقائی عمل کی تشخیص نباض ادب افراد کا کام ہے۔ میں نے سنا ہے کہ بعض افراد سائیبر اسپیس میں اشعار شائع کرتے ہیں۔ کوئی شعر ہے جو ایسا کچھ خاص بھی نہیں ہے، لیکن کئی ہزار لوگ اسے لائیک کرتے ہیں تو اس لائیک کی کوئی ارزش نہیں ہے۔ شاعر کے شعر کی قدر و ارزش اہل نظر افراد کی رائے پر منحصر ہوتی ہے۔ جو شعری ذوق رکھتا ہے، جسے معلوم ہے کہ شعر کیا ہے، اچھا شعر کسے کہتے ہیں، برا شعر کیا ہوتا ہے۔ بہرحال شعر کے ارتقاء کے لئے کوشاں رہنا چاہئے۔
محترم وزیر صاحب نے (11) نے جو میرے خیال میں یہاں تشریف رکھتے ہیں، جی ہاں موجود ہیں، کوتاہ مدتی دورے شروع کئے ہیں شاعر کی تربیت کے لئے۔ مگر ایک دن، پانچ دن یا دو ہفتے کے کورس سے کوئی شاعر نہیں بن سکتا۔ یہ فن و ہنر سے تعلق رکھنے والی اسی صنف کا کام ہے جو عوامی سطح پر ہونا چاہئے۔ اگر حکومتی ادارے اس سلسلے میں کچھ کرنا چاہتے ہیں تو اس صنف کے پروگرموں میں تعاون کریں، ان کی مدد کریں، ان کو تقویت پہنچائیں، وسائل فراہم کریں تاکہ وہ اپنے کام بخوبی انجام دے سکیں۔
ایک اور نکتہ یہ ہے کہ جناب بہجتی مرحوم ہمارے ہمدم دیرینہ جو جناب عالی (12) کے وطن یزد کے رہنے والے تھے، البتہ جناب بہجتی کا تعلق (یزد کے علاقے) اردکان سے تھا اور آپ میبد کے رہنے والے ہیں۔ غالبا اردکان اور میبد کے درمیان مختلف مسائل اور معاملات میں اختلاف نظر رہتا ہے۔ بہرحال وہ بڑے اچھے شاعر تھے۔ دعائے ابو حمزہ ثمالی کو انھوں نے شعری پیرائے میں ڈھالا، اب مجھے یہ یاد نہیں ہے کہ دعا کا کتنا حصہ انھوں نے شعری قالب میں پرویا۔ موصوف نے مجھے ایک فقرے کے بارے میں بتایا کہ اسے شعری قالب پہنانا بڑا دشوار تھا، مصرع موزوں ہی نہیں ہو پا رہا تھا۔ تو ایک اہم خدمت یہی ہے کہ انسان ان عظیم دینی متون اور مفاہیم کو منظوم شکل میں تبدیل کرے۔ یہ باقاعدہ ایک شعبہ ہے، ایک میدان ہے، ایک شعری صنف ہے۔ یہ کہنا مقصود نہیں کہ بس یہی کام انجام دیا جائے، کہنے کا مقصد یہ ہے کہ جو کام انجام دئے جا سکتے ہیں ان میں ایک یہ بھی ہے۔ کیونکہ یہ دعائیں عظیم مفاہیم و مضامین کی حامل ہونے کے علاوہ بڑے پائے کے الفاظ سے بھی آراستہ ہیں۔ یہ جو دعائیں ہیں، مثال کے طور پر یہی دعائے عرفہ، دعائے ابو حمزہ، مناجات شعبانیہ، صحیفہ سجادیہ کی دعائیں، یہ عظیم مفاہیم اور اسلامی تعلیمات سے پر ہیں اور واقعی بڑے پرکشش اور بہترین الفاظ کا قالب بھی ان میں موجود ہے۔ بہت اچھا ہے کہ انھیں منعکس کیا جائے۔ یں نے سال گزشتہ یہاں اخوان کا شعر پڑھا تھا (13)۔ البتہ انھوں نے یہ شعر کسی اور پس منظر میں کہا تھا؛

 

 

اب آپ دیکھئے کہ یہ کیسا دل آویز شعر ہے؟! میں نے عرض کیا کہ جب میں یہ شعر پڑھتا ہوں تو دعا کو میں اپنا مخاطب قرار دیتا ہوں۔ دعا کی یہی کیفیت ہوتی ہے؛
«ای تکیه ‌گاه و پناه زیبا ترین لحظه ‌های پُرعصمت و پُرشکوه تنهایی و خلوت من، ای شطّ شیرین پُر شوکت من»
البتہ شاعر اس شعر کو ایک الگ سمت میں لے گیا ہے۔ اب اگر آپ حضرات دعاؤں پر استوار اشعار کو ایسے پرکشش الفاظ کے ساتھ اور اس انداز سے نظم کریں تو اس کا مضمون بھی دل میں اتر جانے والا ہوگا، شعر کی موسیقیت بھی بہت عالی ہوگی، شعر کی موسیقیت بھی ایک الگ باب ہے۔ شعر کی روانی، کشش، پاکیزگی اور موسیقیت شعر کو لکنت اور سکتے وغیرہ سے بہت بالاتر کر دیتی ہے۔ آپ اس روش اور ان بنیادوں کے ساتھ شعر کہئے تو میری نظر میں یہ بڑی اچھی چیز ہوگی۔
آخر میں ایک چیز مذہبی شاعری کے بارے میں عرض کرنا چاہوں گا۔ خوش قسمتی سے یہاں مذہبی شاعری کی وادی کے ہمارے کچھ احباب تشریف فرما ہیں۔ واقعی بڑے اچھے اشعار کہتے ہیں۔ ائمہ علیہم السلام کی شان میں بڑے پرمغز اشعار ہوتے ہیں؛ رثائی کلام بھی، مدح کا کلام بھی، منقبت کے اشعار بھی۔ ان کے اشعار میں بڑے اچھے پہلوؤں کی پیشکش ہوتی ہے۔ البتہ کچھ اشعار میں یہ اوصاف نہیں ہوتے۔ ہماری یہ کوشش ہونا چاہئے کہ مذہبی اشعار ائمہ علیہم السلام کے معارف اور تعلیمات کا مجموعہ ہوں۔ یعنی جب آپ یہ اشعار نوحہ خواں کو یا مرثیہ پڑھنے والے کو دیں تو اس کی اثرانگیزی کئی تقاریر سے زیادہ ہونا چاہئے۔ یعنی اگر واقعی شعر کے اندر پرویا گیا مفہوم عالی درجے کا ہوگا، مثال کے طور پر یہی شعر جو جناب انسانی صاحب (15) نے پیش کئے، اگر اس طرح کے اچھے اشعار ہوں گے، تو چونکہ اس میں فنکارانہ روش استعمال کی گئی ہے اسلئے اس کا اثر کئی تقاریر سے زیادہ ہوگا۔ لیکن اگر ان اشعار میں یہی عام باتیں ہوں گی جن کا مقصد سامعین کو صرف رلانا ہے، البتہ سامعین کو رلانا بھی ایک اہم بات ہے، لیکن ہدف صرف یہی نہیں ہے۔ ہمیں کمیت، دعبل وغیرہ کے اشعار کو دیکھنا چاہئے جو انھوں نے ائمہ علیہم السلام کی شان میں نظم کئے ہیں۔ دیکھئے کہ انھوں نے کس طرح اپنی بات پیش کی ہے، کیا کہا ہے، ان قصائد میں کیا مضامین پروئے ہیں؟ اگر انسان شعر کہنا چاہتا ہے تو اس نہج پر کہنا چاہئے۔
دعا کرتا ہوں کہ اللہ تعالی آپ سب کی حفاظت فرمائے، طول عمر دے کہ آپ بر وقت اور اپنے ملک، اپنے سماج اور اپنے اسلامی نظام کے لئے کام کر سکیں، اچھے کارنامے انجام دے سکیں۔

و السّلام علیکم و رحمة الله و برکاته‌