اتوار 14 ستمبر کو دارالحکومت بغداد میں منعقد ہونے والے بک فیسٹول میں مسئلۂ فلسطین کے حل کے سلسلے میں رہبر انقلاب کے نظریات پر مشتمل کتاب "فلسطین کا ریفرنڈم" کے عربی ترجمے کی رسم اجراء عمل میں آئی جس میں عراق اور فلسطین کی متعدد اہم شخصیات موجود تھیں۔

بغداد کے بین الاقوامی کتب میلے میں اس وقت "فلسطین کا ریفرنڈم" کتاب کے عربی ترجمے کی رسم اجرا، جو مسئلۂ فلسطین کی راہ حل کے بارے میں امام خامنہ ای کے نظریات اور اسی طرح اس سلسلے میں اسلامی جمہوریہ ایران کی تجویز پر مشتمل، ہے عمل میں آئی اور "فلسطین؛ انسانی ضمیر میں" نامی کانفرنس بھی منعقد ہوئی۔

سات عشروں سے حل طلب مسئلہ  فلسطین کا مسئلہ موجودہ دنیا کا سب سے پرانا حل طلب بحران ہے، یہ بحران کسی علاقے پر قبضے، لاکھوں افراد کی دربدری، انسانی حقوق کی مسلسل خلاف ورزی اور لگاتار جنگوں سے پیدا ہوا ہے اور جس نے ہر نسل کو مصائب اور نئے سوالات سے دوچار کیا ہے۔ مغربی طاقتوں اور ثالثی کرنے والے بعض علاقائی فریقوں کی طرف سے اب تک جو حل تجویز کیے گئے ہیں، وہ یا تو "مسلط کردہ سازباز" پر مرکوز ہیں یا انھوں نے فلسطینیوں کی اراضی کی جعلی تقسیم کے ذریعے غاصبانہ قبضے کی حقیقت کو چھپایا ہے۔ نتیجہ واضح ہے: نہ تو پائیدار امن قائم ہوا ہے، نہ دربدری اور جلاوطنی ختم ہوئی ہے، اور نہ ہی سلامتی اور انصاف قائم ہوا ہے۔ یہ کتاب اسی بنیادی مسئلے سے شروع ہوتی ہے: موجودہ حل کیوں کام نہیں کر رہے ہیں اور کون سا "حقیقت پسندانہ، منصفانہ اور جمہوری" حل ہے جو اس معیوب عمل کو ختم کر سکتا ہے؟ رائج راہہائے حل: "غاصب ریاست سے مصالحت" سے لے کر "اس سے تعلقات معمول پر لانے" تک پچھلے منصوبوں کے ڈھانچے نے زیادہ تر فلسطین کو سودے بازی کے ایک موضوع میں تبدیل کر دیا ہے: ایک ایسی حکومت کے ساتھ مذاکرات جو طاقت کے بل پر قائم ہوئی ہے، حقیقی خودمختاری کے بجائے "کم اختیارات والی خود مختار ریاستوں" کو قبول کرنا یا امریکا کے ذریعے، جو خود کو چودھری سمجھتا ہے، مسئلے کے حل کی امید میں اس حکومت سے تعلقات معمول پر لانا۔ ان منصوبوں میں نہ تو بحران کی جڑ، یعنی اصل زمین کے مالکوں کے حق خود ارادیت اور نہ ہی فلسطینی قوم کی مرضی پر توجہ دی گئی ہے۔ اس طرح کے طریقۂ کار کا نتیجہ صیہونی حکومت کے ذریعے فلسطین پر مزید غاصبانہ قبضے کے سوا کچھ نہیں رہا ہے۔ ریفرنڈم کا انعقاد، مسئلۂ فلسطین کے حل کے لیے اسلامی جمہوریہ کی منصفانہ اور ڈیموکریٹک تجویز یہ کتاب حضرت آیت اللہ خامنہ ای کے نظریات کو مرتب طریقے سے یکجا کر کے، جن کی بنیاد اسلامی تعلیمات ہیں، ایک واضح اور قابل آزمائش راہ حل پیش کرتی ہے: تمام آوارہ وطن فلسطینیوں کی اپنی سرزمین پر واپسی کے بعد حکمراں ڈھانچے کے تعین کے لیے، پوری تاریخی سرزمین فلسطین پر سبھی اصل فلسطینیوں کے درمیان، چاہے وہ مسلمان ہوں، عیسائی ہوں، یا یہودی ہوں، ایک قومی ریفرنڈم کا انعقاد۔ اس تناظر میں سرزمین فلسطین کے حقیقی مالکوں کے ووٹوں کو جمہوری طریقے (عوامی رائے سے رجوع یا ریفرنڈم) سے یکجا کیا جائے گا۔ اس منصوبے کی بنیادی خصوصیات حسب ذیل ہیں: 1۔ تمام آوارہ وطن فلسطینیوں کو اپنی سرزمین پر واپسی کا حق 2۔ بین الاقوامی نگرانی میں معتبر منظم اور جامع ریفرنڈم کا انعقاد 3۔ پورے فلسطین پر فلسطینیوں کی اکثریت کے ووٹوں سے ایک منتخب حکومت کی تشکیل 4۔ فلسطین میں مقیم غیر مقامی مہاجرین کے بارے میں فیصلے کا اختیار عوامی ووٹ سے منتخب حکومت کو سونپنا کتاب تشریح کرتی ہے کہ یہ حل نہ صرف جمہوریت کے بنیادی اصولوں کے مطابق ہے بلکہ معتبر بین الاقوامی حقوق کے معیارات، اپنے مستقبل کے تعین کے حق سے لے کر انسانی حقوق کی ضروریات تک، سے بھی ہماہنگ ہے، یہاں تک کہ اس کے عملی نفاذ کی تجویز بھی اقوام متحدہ کو پیش کی جا چکی ہے اور ایک دستاویز کے طور پر دستیاب ہے۔ "ریفرنڈم" کیوں کارگر ثابت ہوتا ہے؟ اس کے کارگر ہونے کے تین پہلو  اخلاقی پہلو: فیصلے کا معیار "سرزمین کے مالکوں کا حق" ہے۔ یہ منصوبہ کسی مذہبی گروہ کو خارج نہیں کرتا اور مسلمانوں کے ساتھ ہی یہودی اور عیسائی فلسطینیوں کو بھی باضابطہ طور پر تسلیم کرتا ہے۔ یہ منصوبہ غیر جانبدارانہ انصاف پر مبنی ہے۔  قانونی پہلو: اپنے مستقبل کے تعین کا حق ایک عالمگیر اصول ہے۔ ریفرنڈم اس حق کے عملی جامہ پہننے کا وسیلہ ہے اور بین الاقوامی عدالتی اداروں کے مشورتی فیصلوں سے ہماہنگی رکھتا ہے۔  آپریشنل پہلو: کتاب نعروں سے آگے بڑھ کر "عملدرآمد کا پلان" پیش کرتی ہے: فلسطینیوں کی جامع شناخت اور رجسٹریشن، فلسطینی عوام کے نمائندوں کی شرکت سے ایک بین الاقوامی اجرائی کمیٹی کی تشکیل، امدادی فنڈ کی  تخصیص اور الیکشن کی نگرانی اور ووٹرز کی سیکورٹی کے طریقۂ کار کی تیاری۔ اس کا نتیجہ فلسطینیوں کی وطن واپسی، ووٹنگ، حکومت کی تشکیل اور حکومتی فیصلہ سازی کا ایک مرحلہ وار راستہ ہے۔ اس فریم ورک میں مزاحمت اور جمہوریت کا باہمی تعلق یہ کتاب فلسطینی قوم کی قانونی جدوجہد کو جمہوریت کا متبادل نہیں بلکہ جمہوریت کے نفاذ کو مسلط کرنے کا ذریعہ قرار دیتی ہے: جب تک ووٹ کا حق اور واپسی کا حق باضابطہ طور پر تسلیم نہیں کیا جاتا، تب تک غاصب کو ریفرنڈم قبول کرنے پر مجبور کرنے کے لیے عوامی مزاحمت ایک اخلاقی اور سیاسی حق ہے۔ دوسرے الفاظ میں، مزاحمت اور ریفرنڈم دو متوازی خطوط ہیں جو پورے فلسطین پر فلسطینی حکمرانی پر منتج ہوتے ہیں۔ کتاب اور اس کا مواد کتاب دو اصل ابواب پر مشتمل ہے:  پہلے باب میں "شکست خوردہ راہہائے حل" کا گہرائی سے جائزہ لیا گیا ہے اور مزاحمت کے فلسفے، تھوپی گئی مصالحت کی نفی اور "حق" کے معیار کی بحالی کی ضرورت کو پیش کیا گیا ہے۔  دوسرے باب میں "اسلامی جمہوریۂ ایران کے نظریے" کی تفصیل سے وضاحت کی گئی ہے: فلسطین کے فلسطینیوں کی ملکیت ہونے کے اصول، فیصلہ کرنے کے ان کے حق سے لے کر ریفرنڈم کے انعقاد کی تفصیلات، مشارکت کے دائرے، بین الاقوامی اداروں کے کردار اور عملدرآمد کے چار مراحل کو بیان کیا گيا ہے۔ کتاب کے ضمیمے میں اقوام متحدہ کو بھیجا گیا سرکاری خط شامل ہے جو "قومی ریفرنڈم" کے قانونی اور عملی فریم ورک کی دستاویز سازی کرتا ہے۔ یہ کتاب کن لوگوں کو پڑھنا چاہیے؟  مشرق وسطیٰ کی اسٹڈیز اور بین الاقوامی حقوق اور امن کے محققین اور طلباء، سول اور میڈیا ایکٹیوسٹس، پالیسی ساز اور سفارت کار اور وہ تمام قارئین جو کئي عشروں پر محیط ایک طویل ترین تنازعے کے خاتمے کے لیے ایک منصفانہ، ڈیموکریٹک اور قابل عمل حل کی جستجو میں ہیں۔ یہ کتاب فکری و نظریاتی فریم ورک بھی پیش کرتی ہے، آپریشنل نقشہ بھی دکھاتی ہے اور قانونی بنیادیں بھی مہیا کراتی ہے، خاص طور پر فلسطینی قوم کی آواز کو مسئلے کے حل کا حتمی اور آخری معیار قرار دیتی ہے۔  "فلسطین کا ریفرنڈم" بے بنیاد معاہدوں کی بندگلی سے نکل کر حق اور رائے شماری کے واضح راستے پر واپسی کی ایک دعوت ہے۔ اگر ہم پائیدار امن چاہتے ہیں، تو ہمیں خودمختاری اس کے حقیقی مالکوں کو واپس کرنی ہوگی، اور یہ کتاب پوری وضاحت کے ساتھ اس کی انجام دہی کا راستہ دکھاتی ہے۔

55 فیصد نوجوان امریکیوں کا خیال ہے کہ اسرائیل، غزہ میں نسل کشی کر رہا ہے، یہ اعداد و شمار صیہونی حکومت کے اقدامات پر منفی سوچ میں شدید اضافے کی عکاسی کرتے ہیں۔

بچوں کی قاتل صیہونی حکومت کے فوجیوں نے 29 جنوری 2024 کو غزہ کے تل الہوا محلے میں ایک گاڑی پر، جس میں چھے سالہ فلسطینی بچی ہند رجب موجود تھی، 335 گولیاں ماریں  اور اسے قتل کر دیا۔

صیہونی حکومت کے مجرم فوجی ذلت آمیز قہقہے کے ساتھ اور تفریح کے طور پر غزہ کے رہائشی علاقوں کو دھماکے سے اڑا دیتے ہیں۔

حجاج کرام کے نام رہبر انقلاب کے پیغام (4 جون 2025) پر ایک نظر

آپ با سعادت حجاج، خداوند متعال سے ظالم صیہونیوں اور ان کے حامیوں پر فتح کی دعا کیجیے۔ رہبر انقلاب کے پیغام حج 2025 سے اقتباس

وہ تصویریں جو غزہ سے آ رہی ہیں انھوں نے اسرائيل کو واقعی پوری دنیا میں نفرت انگیز بنا دیا ہے۔ ہمیں لگتا ہے کہ ہم سے ہر جگہ نفرت کی جاتی ہے۔ پوری دنیا ہمارے خلاف ایک ہو گئی ہے۔ ان جملوں کو بولنے والے بالترتیب ایک صیہونی رپورٹر، ایک صیہونی ٹور لیڈر اور صیہونی وزیر اعظم ہیں۔ اگرچہ بہت سے لوگوں کا ماننا ہے کہ میڈیا میں یہ جملے اپنے آپ کو مظلوم ظاہر کرنے اور غیر ملکی امداد حاصل کرنے کے لیے کہے گئے ہیں لیکن یہ علامت ہے، اس میدان میں شکست کی علامت جس میں صیہونی حکومت ہمیشہ فاتح رہی ہے۔

صیہونی حکومت اللہ کے اٹل فیصلے سے بکھر رہی ہے اور ان شاء اللہ اس میں زیادہ وقت نہیں لگے گا۔

رہبر انقلاب اسلامی نے بدھ 4 جون 2025 کی صبح امام خمینی رحمت اللہ علیہ کے مزار پر ان کی چھتیسویں برسی کے پروگرام میں اپ نے اہم خطاب میں امام خمینی کو اسلامی جمہوریہ کے مستحکم، طاقتور اور پیشرفت کرنے والے نظام کا عظیم معمار قرار دیا۔

بسم اللہ الرحمن الرحیم والحمد للہ رب العالمین والصلاۃ والسلام علی خیر خلق اللّہ محمدٍ المصطفی وآلہ الطیبین و صحبہ المنتجبین و مَن تبعہم بِاحسانٍ الی یوم الدین. حج، مومنوں کی آرزو، اشتیاق رکھنے والوں کی عید اور سعادت مند لوگوں کا روحانی رزق ہے اور اگر یہ باطنی رموز کی معرفت کے ساتھ انجام دیا جائے تو امت مسلمہ بلکہ پوری انسانیت کی زیادہ تر بیماریوں کا مداوا ہے۔ حج کا سفر، تجارت، سیاحت یا دوسرے مختلف مقاصد سے انجام پانے والے سفر جیسا نہیں ہے جس کے دوران ممکنہ طور پر کوئی عبادت یا کوئي نیک کام بھی انجام دے دیا جاتا ہے، حج کا سفر، معمولی زندگي سے مطلوبہ زندگي کی طرف ہجرت کی مشق ہے۔ مطلوبہ زندگی وہ توحیدی زندگی ہے جس میں حق کے محور کے گرد دائمی طواف، مشکل چوٹیوں کے درمیان مسلسل سعی، شر پسند شیطان کو پتھر مارنا، ذکر و دعا سے مملو وقوف، زمین گیر مسکین اور سفر میں مجبور ہو جانے والے راہگیر کو کھانا کھلانا، رنگ، نسل، زبان اور جغرافیہ کے فرق کو یکساں سمجھنا، ہر حال میں خدمت کے لیے تیار رہنا، خدا کی پناہ لینا اور حق کے دفاع کا پرچم بلند کرنا اس زندگی کے بنیادی اور دائمی اجزاء ہیں۔ حج کے مناسک نے اس زندگی کی علامتی مثالیں اپنے اندر سمو رکھی ہیں اور حج گزار کو اس سے روشناس کراتے اور اس کی طرف دعوت دیتے ہیں۔ اس دعوت کو سننا چاہیے۔ دل کو اور ظاہر و باطن کی آنکھوں کو کھولنا چاہیے۔ سیکھنا چاہیے اور ان دروس کو استعمال کرنے کے لیے کمر کس لینی چاہیے۔ ہر شخص اپنی استطاعت کے مطابق اس راہ میں ایک قدم بڑھا سکتا ہے، اور علماء، دانشور، سیاسی منصب دار اور سماجی حیثیت رکھنے والے افراد دیگروں سے زیادہ ذمہ دار ہیں۔ دنیائے اسلام کو آج پہلے سے کہیں زیادہ ان دروس پر عمل کرنے کی ضرورت ہے۔ یہ دوسرا حج ہے جو غزہ اور مغربی ایشیا کے المناک واقعات کے دوران انجام پا رہا ہے۔ فلسطین پر قابض مجرم صیہونی گینگ نے ناقابل یقین درندگي اور عدیم المثال بے رحمی اور شر انگيزی کے ساتھ غزہ کے المیے کو ایک ناقابل یقین حد تک پہنچا دیا ہے۔ اس وقت فلسطینی بچے بموں، گولوں اور میزائيلوں کے علاوہ بھوک اور پیاس سے مر رہے ہیں۔ اپنے عزیزوں، جوانوں اور ماں باپ کو کھونے والے غم رسیدہ گھرانوں کی تعداد روز بروز بڑھتی جا رہی ہے۔ اس انسانی المیے کے سامنے کسے کھڑا ہونا چاہیے؟ بلاشبہ یہ فریضہ سب سے پہلے اسلامی حکومتوں پر عائد ہوتا ہے اور پھر اقوام پر جو اپنی حکومتوں سے اس فریضے کی انجام دہی کا مطالبہ کریں۔ مسلم حکومتیں شاید مختلف مسائل میں آپس میں سیاسی اختلاف رکھتی ہوں لیکن یہ اختلافات غزہ کے المناک مسئلے پر متفقہ موقف اپنانے اور آج کی دنیا کے سب سے مظلوم انسانوں کے دفاع میں تعاون کے سلسلے میں ان کے آڑے نہ آئیں۔ مسلم حکومتوں کو صیہونی حکومت کی امداد رسانی کی تمام راہوں کو بند کر دینا چاہیے اور اس مجرم کو غزہ میں اپنی بے رحمانہ کارروائی جاری رکھنے سے باز رکھنا چاہیے۔ امریکا، صیہونی حکومت کے جرائم کا یقینی شریک ہے، اس خطے میں اور دیگر اسلامی علاقوں میں امریکا سے وابستہ لوگ، مظلوم کے دفاع کے سلسلے میں قرآن مجید کی آواز سنیں اور امریکا کی سامراجی حکومت کو اس ظالمانہ رویے کو روکنے پر مجبور کریں۔ حج میں برائت کا اعلان، اس راہ میں ایک قدم ہے۔ غزہ کے عوام کی حیرت انگیز مزاحمت نے مسئلۂ فلسطین کو عالم اسلام اور دنیا کے تمام آزاد منش انسانوں کی توجہ کا سب سے بڑا مرکز بنا دیا ہے۔ اس موقع سے فائدہ اٹھانا چاہیے اور اس مظلوم قوم کی حمایت کے لیے آگے بڑھنا چاہیے۔ مسئلۂ فلسطین کا نام اور اس کی یاد کو طاق نسیاں کی زینت بنا دینے کی سامراجیوں اور صیہونی حکومت کے حامیوں کی کوششوں کے باوجود اس حکومت کے حکمرانوں کی شر پسند ماہیت اور ان کی احمقانہ پالیسی نے ایسی صورتحال پیدا کر دی ہے کہ آج فلسطین کا نام ہمیشہ سے زیادہ درخشاں ہے اور صیہونیوں اور ان کے حامیوں سے نفرت، ہمیشہ سے زیادہ ہے اور یہ عالم اسلام کے لیے ایک اہم موقع ہے۔ اہل سخن اور سماجی حیثیت رکھنے والے افراد کے لیے ضروری ہے کہ وہ اقوام کو آگاہ کریں، انھیں حساس بنائیں اور فلسطین سے متعلق مطالبات کو مزید پھیلائيں۔ آپ باسعادت حجاج بھی، حج کے مناسک کے دوران دعا اور خدا سے مدد طلب کرنے کے موقع سے غفلت نہ کیجیے اور خداوند متعال سے ظالم صیہونیوں اور ان کے حامیوں پر فتح کی دعا کیجیے۔ خداوند عالم کی صلوات و سلام ہو پیغمبر اکرم، ان کی پاکیزہ آل پر اور سلام و درود ہو بقیۃ اللہ حضرت مہدی 'عجل اللہ ظہورہ' پر۔   سید علی خامنہ ای 3 ذی الحجہ 1446 ہجری قمری 30 مئی 2025

غزہ میں صیہونی حکومت کے جرائم کو رکوانے کے لیے ایران اور پاکستان کا مل کر مؤثر قدم اٹھانا ضروری ہے۔ امام خامنہ ای 26 مئی 2025

اس وقت آپ نے مزاحمتی محاذ کا ایک حصہ تشکیل دیا ہے اور اپنی حکومت کے بے رحمانہ دباؤ کے باوجود، جو کھل کر غاصب اور بے رحم صیہونی حکومت کا دفاع کر رہی ہے، ایک شرافت مندانہ جدوجہد شروع کی ہے۔ امریکی اسٹوڈنٹس کے نام امام خامنہ ای کے خط کا ایک حصہ 25 مئی 2024

رہبر انقلاب اسلامی نے دو روز قبل پیر 12 مئی 2025 کو امداد رساں شہیدوں پر قومی سیمینار کی منتظمہ کمیٹی سے ملاقات کی تھی۔ اس موقع پر ان کا خطاب آج 14 مئی کی شام کو سیمینار کے مقام پر نشر کیا گيا۔

مسلم اقوام اس بات کی اجازت نہ دیں کہ فلسطین کو بھلا دیا جائے۔ امام خامنہ ای 10 مئی 2025

رہبر انقلاب اسلامی آيت اللہ العظمی خامنہ ای نے 10 مئی 2025 کو ہفتہ محنت کشاں کی مناسبت سے ملک کے لیبر طبقے کے ہزاروں افراد سے ملاقات میں سماج کے اس طبقے کی کلیدی حیثیت و کردار، اس کے حقوق اور فرائض کے بارے میں گفتگو کی۔ آپ نے مسئلہ فلسطین کو ذہنوں سے دور کرنے کی کوششوں کا ذکر کرتے ہوئے اس مسئلے پر مسلسل توجہ رکھنے کی تاکید فرمائی۔ (1) خطاب حسب ذیل ہے:

رہبر انقلاب اسلامی آیت اللہ العظمی خامنہ ای نے 15 اپریل 2025 کو عدلیہ مقننہ اور مجریہ کے اعلی عہدیداروں سے سال نو کی مناسبت سے اپنی ملاقات میں ملکی مسائل، ایٹمی مذاکرات اور فلسطین کے حالات کے سلسلے میں گفتگو کی۔  (1) خطاب حسب ذیل ہے:

رہبر انقلاب اسلامی آيت اللہ العظمیٰ خامنہ ای نے نئے ہجری شمسی سال کے آغاز کی مناسبت سے انتظامیہ، مقننہ اور عدلیہ کے بعض اعلیٰ عہدیداروں ملاقات کی۔