قرآن حکیم میں کئی مقامات پر "یسارعُونَ فِي الْخَيْرات" کا ذکر ہے: اور بھلائی کے کاموں میں تیزی کرتے ہیں اور یہی لوگ نیک لوگوں میں سے ہیں۔ (سورۂ آل عمران، آیت 114) گویا قرآن نے حقیقی معنوں میں فرمایا ہے کہ نیک کاموں میں اور مومنانہ تعاون میں باہمی مقابلہ آرائی اور سبقت سے کام لیجیے کہ آپ دوسروں سے پہلے اور بہتر شکل میں اقدام کر یں۔ یہ کام میری نگاہ میں بہت اہم ہے یعنی پیش قدمی، حتی یہ محرم میں کھانا کھلانا بھی، جو ان ایام میں بعض انجمنیں یا بعض افراد نذر کا اہتمام کرتے اور کھانا کھلاتے ہیں، اس طرح سے گھرانوں کی مومنانہ امداد کی جاسکتی ہے۔ انقلابی اقدامات اپنے حقیقی معنی میں در اصل یہ ہیں، جو ہونے چاہیے۔ امام خامنہ ای 22 جولائی 2020

زندگی کی حقیقتوں سے بالاتر، آرزوئیں، محبتیں اور انسانی جذبات و احساسات زندگی میں اپنا کردار ادا کرتے ہیں اور ان کا کردار بھی دوسروں کی پیروی، دیکھا دیکھی یا دوسرے درجے کا نہیں بلکہ اصلی (اور فطری) ہے۔ یہ اس نہایت ہی قوی و مستحکم عبادت کے لیے ایک بنیاد کا کام کر سکتا ہے۔ میاں بیوی دونوں کو اپنے اپنے مقام سے آشنا ہونا چاہیے، دونوں ایک دوسرے کو ہمیشہ محبت سے سرشار نگاہوں سے دیکھیں اور اس عشق کی حفاظت کریں کیونکہ یہ ختم اور زائل ہونے والی چیز نہیں ہے۔ دوسری تمام (قیمتی) چیزوں کی طرح اس کی حفاظت کریں کہ زائل نہ ہونے پائے۔ امام خامنہ ای 12 مارچ 2000

اسلام میں انفاق (یعنی راہ خدا میں خرچ کرنا) ایک اصولی بات ہے، راہ خدا میں خرچ کرنا چاہیے ، (ہم) یہ نہیں کہتے کہ مال و دولت حاصل نہ کیجیے، کیجیے لیکن خرچ کیجیے، اسلام لوگوں کو عادی بنانا چاہتا ہے کہ انھوں نے زندگی کی ضروریات کے برابر جو کچھ کمایا ہے، ایک متوسط زندگی کے لیے جو لازم ہے، مراد تنگی و سختی کے ساتھ گزر بسر کرنا نہیں ہے بلکہ عام لوگوں کی متوسط زندگی جتنا، وہ چاہے آرام و آسائش اور کشادگی کی زندگی ہی کیوں نہ ہو، اپنے لیے خرچ کرے، اس کے بعد جو بچے وہ معاشرے کے عام لوگوں کی بھلائی اور مفاد میں خرچ کرنا چاہیے۔ امام خامنہ ای 6 نومبر 1987

آج ہمارا دشمن، یعنی صیہونی حکومت، دنیا کی سب سے زیاد قابل نفرت حکومت ہے۔ دنیا کی اقوام بھی صیہونی حکومت سے بیزار ہیں، اس سے متنفر ہیں۔ حکومتیں بھی صیہونی حکومت کی مذمت کرتی ہیں۔ امام خامنہ ای 24 اگست 2025

میں زیادہ تر جس وقت اپنے لیے، دوسروں کے لیے اور حکام کے لیے بے عملی کا احساس کرتا ہوں تو یہ آیت مجھے یاد آجاتی ہے: اور ذوالنون (حضرت یونس) کو یاد کیجیے جب وہ غصہ ہوکر چلے گئے اور وہ سمجھے کہ ہم ان پر تنگی نہیں کریں گے۔ (سورۂ انبیاء، آيت 84) ہم سمجھتے ہیں کہ یہ لاپروائی، بے اہتمامی اور بے عملی، اللہ تعالی کی جانب سے سخت ردعمل کا باعث نہیں بنے گی؟!! کیوں نہیں، ضرور بنے گی۔ یعنی یہ بات ہمارے لیے عملی صورت اختیار کر لے گي اور خود کو ظاہر کر دے گي۔ امام خامنہ ای 22 فروری 2021

کبھی ایسا ہوتا ہے کہ ایک فریضے کی اہمیت انسان کے ایک بچے کی جان، ایک شخص کی بیوی کی جان یا ایک انسان کے ماں باپ کی جان سے بھی بالاتر ہوجاتی ہے، لہذا آپ امام حسین علیہ السلام سے عرض کرتے ہیں: "مولا! آپ پر میرے ماں باپ قربان۔" جی ہاں! ان کی چاہت کو اللہ اور اللہ کی راہ میں جہاد سے بالاتر قرار نہ دیں، ایک مقام اس طرح کا بھی ہے لیکن ان مقامات کے علاوہ دوسرے امور میں، ایک خاتون کے فرائض کا محور اس کا گھر ہے اور واقعیت بھی یہی ہے۔ گھر کا وجود بیوی کی موجودگی کے بغیر، بیوی کے کاموں کے بغیر اور بیوی کے فرائض کا احساس کیے بغیر چلنا ممکن نہیں ہے۔ امام خامنہ ای 4 جنوری 2023

توبہ کے ارکان میں سے ایک استغفار ہے یعنی خداوند متعال سے معافی مانگنا۔ یہ اللہ کی عظیم نعمتوں میں سے ہے یعنی خداوند متعال نے اپنے بندوں کے لیے توبہ کا دروازہ کھول رکھا ہے کہ وہ کمال وارتقاء کی راہ میں آگے بڑھ سکیں اور گناہ اُن کو زمین بوس نہ کرے کیونکہ گناہ انسان کو انسانی ارتقاء کی بلند چوٹیوں سے گہری کھائیوں میں گرا دیتا ہے۔ گناہوں کی طرف اٹھنے والا ہر ایک قدم روح انسانی کو داغدار کردیتا اور انسان کی پا کیزگی، معنویت اور روحانی قوت کو مجروح کر دیتا ہے۔ روح کی شفافیت زائل ہوجاتی ہے اور خراشیں نمایاں ہو جاتی ہیں۔ امام خامنہ ای 17 جنوری 1997

غفلت وہی چیز ہے کہ جس سے قرآن میں بار بار پرہیز اور گریز پر تاکید کرتے ہوئے ہم کو خبردار کیا گیا ہے۔ سورۂ انبیاء کی آیت 97 میں کہا گيا ہے: ہائے افسوس! ہم اس سے غفلت میں رہے۔ کافر قیامت میں اس طرح فریاد کریں گے: ہم پر وائے ہو، ہم غفلت میں متبلا تھے۔ یہ غفلت بہت بڑی بلا ہے لہذا نافلۂ شب سے متعلق دعاؤں میں سے ایک دعا میں یوں آیا ہے: اے خدا! ہم غفلت سے تیری بارگاہ میں پناہ مانگتے ہیں۔ یعنی غفلت، ذکر کی ضد ہے۔ قرآن بھی ذکر ہے۔ آپ جتنا زیادہ قرآن سے مانوس ہوں گے اتنا ہی زیادہ ذکر انجام پائے گا۔ امام خامنہ ای 3 مارچ 2022

ایک عورت، علم و روحانیت کے کسی بھی مقام پر رہ کر جو اہم ترین کردار ادا کرسکتی ہے وہ، وہ کردار ہے جو وہ ایک ماں اور بیوی کی حیثیت سے ادا کرسکتی ہے۔ یہ اس کے دوسرے تمام کاموں سے زیادہ اہم ہے۔ یہ وہ کام ہے جو اس کے علاوہ کوئی بھی دوسرا شخص انجام نہیں دے سکتا۔ بنی نوع انسان کی بقا و ترقی اور انسان کی اندرونی صلاحیتوں کا پھلنا پھولنا اور اجاگر ہونا اس سے وابستہ ہے، معاشرے کی روحانی سلامتی اور تحفظ کی ذمہ داری اس کی ہے، بے چینی، بے قراری اور اضطراب کے مقابل انسان کا آرام، سکون اور اطمینان اس سے وابستہ ہے۔ امام خامنہ ای 4 جولائی 2007

"میں نے جب بھی جناب فرشچیان کی پینٹنگ کو دیکھا، جسے انہوں نے کئی سال پہلے مجھے دیا تھا، رویا ہوں؛ ہم ایسی حالت میں کہ مرثیہ پڑھنا جانتے ہیں، جناب فرشچیان ایسا مرثیہ پڑھتے ہیں کہ ہم سب کو رلاتے ہیں۔ یہ کتنا فائدہ مند اور با معنی فن ہے کہ ایک مصوّر اس میں ایسی حالت پیدا کر دے۔ امام خامنہ ای 1 ستمبر 1993