رہبر انقلاب اسلامی نے زور دیکر کہا کہ اسلامی نظام کا دشمن محاذ، ایرانی نوجوانوں کی انقلابی و دینی ماہیت کو دگرگوں کر دینے کی کوشش میں ہے اور ان کا جذبہ امید و نشاط سلب کر لینا چاہتا ہے جبکہ اس پنہاں اور پیچیدہ تصادم میں کامیابی کا واحد طریقہ اس نرم جنگ کے افسروں کا کردار نبھانے والے دیندار، انقلابی، پاکدامن، پرعزم، ہوشیار، جوش و جذبے سے سرشار، فکر و تدبر سے آراستہ اور شجاع و فداکار نوجوانوں کی تربیت ہے۔
آیت اللہ العظمی خامنہ ای نے مغربی ایشیا کے علاقے اور عالمی سطح پر ایران کی محکم پوزیشن، مسئلہ فلسطین، اسلامی مزاحمتی محاذ اور ایرانی و اسلامی طرز زندگی کو بھی اسلامی جمہوری نظام اور استکباری محاذ کے تصادم کے کچھ دیگر موضوعات سے تعبیر کیا اور فرمایا کہ اگر کسی ملک میں مغربی طرز زندگی رائج ہو جائے تو اس سماج کی ممتاز شخصیات استکبار کی پالیسیوں کے سامنے سر تسلیم خم کر دینے کی عادی ہو جاتی ہیں۔
رہبر انقلاب اسلامی نے فرمایا کہ نوجوانوں کی دینداری، پاکدامنی اور پارسائی نیز لذات و شہوات سے اجتناب پر مسلسل تاکید کو رجعت پسندی اور دقیانوسیت نہیں کہنا چاہئے۔ آپ نے فرمایا کہ اہل مغرب بالخصوص امریکی اس کوشش میں ہیں کہ ایرانی نوجوان زیور ایمان سے محروم، بزدل، جوش و جذبے سے عاری، جذبہ عمل سے بے بہرہ، مایوس، دشمن کے سلسلے میں خوش فہمی اور اپنے توانائیوں کے سلسلے میں بدگمانی میں مبتلا انسان بن جائے، جبکہ اسلامی نظام ایسے نوجوانوں کی تربیت کے لئے کوشاں ہے جو استکباری محاذ کی مرضی کے برخلاف سمت میں قدم بڑھائے۔
رہبر انقلاب اسلامی کے خطاب کا اردو ترجمہ پیش خدمت ہے؛

عزیزان محترم آپ سب کو خوش آمدید کہتا ہوں۔ یہ نشست میرے لئے بڑی دل آویز اور شیریں ہے۔ اس جوش و خروش کے ساتھ نوجوانوں کی یہاں تشریف آوری، ان کی اچھی اچھی باتیں، یہ شائستہ استدلال، یہ جو پروگرام پیش کئے گئے۔ حقیقت میں ان چیزوں سے ہماری اس نشست میں شیرینی گھل گئی۔ میرے لئے آج کا یہ دن یادگار بن گیا۔
سب سے پہلے ایک چیز ماہ رجب کے باب میں عرض کرنا چاہوں گا۔ ہر انسان کے وجود میں ایک لطیف اور روحانی پہلو ہوتا ہے۔ انسان مختلف پہلوؤں، فطری میلانات اور احتیاجات کا مجموعہ ہے۔ ہر انسان کے اندر ایک روحانی و معنوی پہلو ہوتا ہے، ہر انسان کے اندر۔ یہ بڑا لطیف اور ظریف پہلو ہے۔ نوجوانی کے ایام میں اس پہلو کی لطافت و شفافیت زیادہ نمایاں ہوتی ہے اور یہ زیادہ درخشاں ہوتا ہے۔ اس پہلو کو اگر ہم اپنے وجود کے اندر تقویت پہنچانے میں کامیاب ہوں تو وہ ہمارے وجود کے دوسرے پہلوؤں کی بھی ہدایت و رہنمائی کرتا ہے۔ ایسا نہیں ہے کہ یہ روحانی و معنوی پہلو فطری خواہشات کے پہلو کو، احتیاجات کے پہلو کو، تدبر اور عقل پسندی کے پہلو کو مسدود کر دیتا ہے۔ نہیں، یہ سارے پہلو اپنی جگہ محفوظ رہتے ہیں اور ساتھ ہی ساتھ وجود انسانی کا یہ روحانی و معنوی پہلو تمام دیگر پہلوؤں کی رہنمائی کرتا ہے، انھیں سنوارتا ہے۔ لیکن شرط یہ ہے کہ ہمارے وجود کا یہ پہلو باقی رہے اور اسے تقویت پہنچائی جائے۔ آپ دنیا میں جو خباثتوں میں ڈوبے ہوئے انسان دیکھتے ہیں؛ ظلم کر رہے ہیں، سفاکیت پر تلے ہوئے ہیں، پیسے کے لالچی ہیں، شہوانی خواہشات کے اسیر ہیں، شکم پرست ہیں اور مادی پہلوؤں کا ان کے وجود پر غلبہ ہے تو یہ ایسے لوگ ہیں جنھوں نے اپنے وجود میں اس روحانی و معنوی پہلو کو نمو کا موقع نہیں دیا ہے جس کی وجہ سے وہ رفتہ رفتہ مضمحل ہوتا چلا گیا ہے، یا بالکل نابود ہو گیا ہے۔ میں آپ نوجوانوں سے یہ عرض کرنا چاہوں گا کہ ماہ رجب سے بھرپور کسب فیض کیجئے اور اس روحانی پہلو کی تقویت کے لئے اس مہینے سے استفادہ کیجئے۔
ماہ رجب کے بعد ماہ شعبان ہے اور پھر ماہ رمضان ہے جو روحانیت و معنویت کی بہار ہے۔ آپ سب بھی، جیسا کہ جناب الحاج علی اکبری صاحب نے فرمایا، مظہر بہار انسانیت ہیں۔ اس لئے کہ عمر کے موسم بہاراں سے آپ گزر رہے ہیں۔ لہذا اس بہار روحانیت سے کما حقہ مستفیض ہونے کی کوشش کیجئے۔ ذکر و مناجات، جو دعائیں وارد ہوئی ہیں، ان دعاؤں کے مضامین پر توجہ، تلاوت کلام پاک، اول وقت نماز، گناہوں سے پرہیز، اچھے اخلاقیات، ان ساری چیزوں کے لئے اس مہینے میں بڑا عظیم موقع ہے جو ہم سب کو ملا ہے، تاہم آپ نوجوان ان مواقع سے زیادہ بہتر انداز میں کسب فیض کر سکتے ہیں، بالکل مادی مواقع کی طرح۔ آپ ایک میدان کا تصور کیجئے۔ اس میدان کے دوسرے سرے پر ایک علامت رکھ دی گئی ہے۔ اب ہم سے اور آپ سے یہ کہا جا رہا ہے کہ جو جلدی پہنچے اس علامت کو اٹھا لے۔ آپ بتائیے کہ وہاں جلدی کون پہنچے گا؟ ظاہر ہے کہ آپ نوجوان ہیں، جسمانی توانائی رکھتے ہیں، نشاط و شادابی سے سرشار ہیں۔ جب تک میں اپنی جگہ سے ہلوں گا آپ وہاں پہنچ کر وہ علامت اٹھا چکے ہوں گے۔ روحانی و معنوی معاملہ بھی ایسا ہی ہے۔ اسے آپ ذہن نشین کر لیجئے۔ روحانی امور میں بھی آپ زیادہ تیزی سے، زیادہ آسانی سے، زیادہ جلدی اور زیادہ شیریں انداز میں منزل مقصود تک پہنچ سکتے ہیں۔ جن لوگوں کو آپ نے دیکھا کہ ہمارے زمانے کی نورانی ہستیوں میں شامل ہوئے، جیسے آیت اللہ بہجت مرحوم کی مثال لے لیجئے، جو ایک نورانی ہست تھے، ضعیف العمر اور حد درجہ نورانی ہستی۔ یہ وہی لوگ ہیں جنھوں نے نوجوانی کے ایام سے، یعنی زندگی کے اسی دور سے جس میں اس وقت آپ ہیں اپنے اعمال اور حرکات و سکنات کے بارے میں بہت احتیاط سے عمل کیا۔ جو لوگ تاخیر سے اس جانب متوجہ ہوتے ہیں ان کی توفیقات بھی کم ہوتی ہیں۔ جو لوگ آخر تک متوجہ نہیں ہوتے وہ نورانیت، شفافیت اور اس درخشندگی سے بالکل محروم ہو جاتے ہیں۔ وہ بھی دنیا کے دوسرے بہت سے انسانوں کی طرح بن جاتے ہیں۔ یہ ہماری پہلی بات ہے۔
آپ نوجوانوں سے مجھے بہت کچھ کہنا ہے۔ مختلف موضوعات اور میدانوں کے بارے میں آپ سے مجھے بہت سی باتیں کرنی ہیں۔ آپ سب ایک اعتبار سے اس حقیر کے بھائی اور بہنیں ہیں اور ایک اعتبار سے میرے بچے ہیں، ایک اعتبار سے میرے پوتے اور پوتیوں کا حکم رکھتے ہیں۔ آپ سب میرے عزیز اور پیارے ہیں۔ یہاں تشریف فرما آپ سب بھی اور اسی طرح وہ کئی ہزار طالب علم، اسکولی طلبہ اور اور بارہ ہزار یونیورسٹی طلبہ جیسا کہ ہمارے اس عزیز نوجوان نے بتایا، سب کے سب وہی درجہ رکھتے ہیں جو میں نے عرض کیا۔ آپ سے مجھے بہت سی باتیں کرنی ہیں۔ مجھے آج ایک بہت بنیادی بات عرض کرنی ہے جس میں ایک مطالبہ بھی شامل ہے، طلبہ کی انجمنوں اور ان انجمنوں کی یونین سے۔ تھوڑی تمہیدی گفتگو کروں گا؛ ہم ایک دشمن محاذ سے جو استکبار، اس کے آلہ کاروں اور حلقہ بگوشوں کا محاذ ہے بر سر پیکار ہیں، یہ بات بالکل واضح ہے۔ اس محاذ کا محور امریکا اور صیہونزم ہے۔ اس کے آلہ کار اور حاشیہ بردار بعض طاقتیں یا نام نہاد طاقتیں ہیں جنھیں آپ دیکھ رہے ہیں۔ ہم ان سے روبرو ہیں۔ اسلامی انقلاب اور اسلامی نظام کا مقابلہ ان سے ہے۔ یہ مقابلہ آرائی کس بات پر ہے؟ یا دوسرے لفظوں میں، استکبار سے ہمارا تنازعہ کن میدانوں میں ہے؟ اگر ہم ان میدانوں کو شمار کرنا چاہیں جن میں استکبار سے ہمارا مقابلہ ہے تو شاید اس وقت میں دس میدان گنوا سکتا ہوں۔ اب اگر ہم بیٹھیں اور غور کریں تو ممکن ہے کہ کچھ اور میدانوں کے بارے میں بھی معلوم ہو۔ شاید بیس تیس یا اس سے زیادہ میدان ہیں جہاں استکبار سے ہماری مقابلہ آرائی جاری ہے۔
مثال کے طور پر آپ ملک کی خود مختاری کے مسئلے کو لے لیجئے! اقتصادی خود مختاری، سیاسی خود مختاری، ثقافتی خود مختاری، یہ استکبار سے ہماری مقابلہ آرائی کا ایک میدان ہے۔ استکبار اور مستکبر طاقتوں کی سرشت یہ ہے کہ دخل اندازی ضرور کرتی ہیں۔ استعمار کے زمانے میں بھی جو اٹھارہویں اور انیسویں صدی کے دوران اور بیسویں صدی تک جاری رہا اور اس جدید استعمار کے دور میں بھی جسے بعد میں شروع کیا گيا ہے اور اب اسے جاری رکھنے کے لئے دائمی طور پر روز بروز نئے نئے طریقے ایجاد کئے جا رہے ہیں۔ ان کا مقصد مداخلت کرنا ہے۔ قوموں کے مفادات میں مداخلت کرنا ہے اور ملکوں پر اپنا غلبہ قائم کرنا ہے۔ استکبار کا مقصد یہ ہے۔ اب اگر کوئی ملک اس مقصد میں آڑے آتا ہے اور اپنی خود مختاری کی حفاظت کرنا چاہتا ہے، چاہے وہ ثقافتی خود مختاری ہو، سیاسی خود مختاری ہو یا اقتصادی خود مختاری ہو، اس کا اگر دفاع کرنا چاہے تو ٹکراؤ ہونا لازمی ہے۔ استکبار سے ہمارے تصادم کا ایک میدان یہ بھی ہے۔
ہمارے باہمی نزاع کا ایک اور میدان ہے پیشرفت۔ اگر ایران جیسا ملک جس نے عالمی طاقتوں سے اپنی بے نیازی کا ثبوت بار بار پیش کیا ہے اور کبھی انھیں لائق اعتنا نہیں سمجھا ہے، ان پر انحصار کی صورت حال پیدا نہیں ہونے دی اور ان پر تکیہ نہیں کیا ہے اور ان تمام کوائف کے باوجود پیشرف کی شاہراہ پر آگے بڑھ رہا ہے تو یہ مثالی پیشرفت مانی جائے گی۔ یعنی دیگر ملکوں کے لئے اور دوسری قوموں کے لئے نمونہ عمل قرار پائے گی۔ یہ پیشرفت بھی استکبار سے ہمارے تنازعے کی ایک اہم وجہ ہے۔ ہم اس پیشرفت کے لئے کوشاں ہیں جبکہ عالمی طاقتیں ہمیں اس قسم کی پیشرفت سے دور رکھنا چاہتی ہیں۔
وہ بنیادی محرکات جنھوں نے ایٹمی مسئلے میں استکباری طاقتوں کو ہمارے خلاف صف آرا ہونے پر مجبور کر دیا ان میں ایک یہی تھا۔ وہ وجوہات تو دوسری بھی گنواتے ہیں لیکن کچھ محرکات بہت بنیادی حیثیت رکھتے ہیں۔ ایک وجہ تو یہی تھی کہ ایک ملک امریکا، برطانیہ یا کسی بھی دوسری بڑی طاقت کی مدد لئے بغیر بے پناہ حساس اور اہمیت کے حامل علمی شعبے میں، جوہری ٹیکنالوجی کے میدان میں ارتقائی منزلیں طے کرے تو یہ ان طاقتوں کو ہرگز برداشت نہیں ہے، وہ ہرگز نہیں چاہتیں کہ ایسا کبھی ہو۔ مجھے یقین ہے کہ اگر ہم انھیں ذرا سی ڈھیل دیں تو کل کو وہ بایو ٹیکنالوجی، نینو ٹیکنالوجی اور دوسرے علمی و سائنسی موضوعات کے بارے میں بھی بہانہ جوئی میں لگ جائیں گی۔ خامیاں اور قابل گرفت باتیں تلاش کرنا شروع کر دیں گی۔ علمی پیشرفت، اقتصادی پیشرفت، تمدنی پیشرفت یہ سب وہ میدان اور موضوعات ہیں جن کے بارے استکبار سے اسلامی جمہوریہ کے شدید اختلافات ہیں۔
اختلاف کا ایک اور موضوع علاقے اور دنیا میں اسلامی جمہوریہ ایران کی مقتدرانہ پوزیشن اور شراکت ہے۔ ایران کی یہ مقتدرانہ موجودگی استکبار کی سازشوں کی راہ میں رکاوٹ ہے۔ امریکا نے مغربی ایشیا کے علاقے کے لئے جسے وہ مشرق وسطی کہتا ہے اور میرا پر زور مطالبہ ہے کہ یہ لفظ ان وجوہات کی بنا پر جن کا میں ذکر کر چکا ہوں، ہرگز نہ استعمال کیا جائے، ایک موقع پر میں نے یہ وجوہات بیان کی تھیں (2)۔ اس علاقے کے لئے اس نے منصوبہ تیار کر رکھا ہے۔ یہ سازش گریٹر مڈل ایسٹ کے زیر عنوان تیار کی گئی ہے۔ جدید مشرق وسطی کی اصطلاح انھوں نے پچھلے دس بارہ سال کے دوران بار بار دہرائی ہے، اس کے لئے انھوں نے پہلے سے سازشیں تیار کر رکھی ہیں۔ اپنے اسی منصوبے کے تحت انھوں نے کچھ اقدامات شروع کر دئے تھے لیکن اسلامی جمہوریہ ایران کی مقتدرانہ موجودگی کی وجہ سے ان کے منصوبے آگے نہیں بڑھ پا رہے ہیں۔ یہ بھی ان سے اختلاف اور ٹکراؤ کا ایک میدان ہے۔
اختلاف کا ایک موضوع ہے مسئلہ فلسطین۔ اسلامی مزاحمت کے معاملے میں بھی اختلاف ہے، مغربی ثقافت اور مغربی طرز زندگی کی ترویج کے بارے میں بھی تصادم ہے۔ کیونکہ اگر کسی ملک میں مغربی یا امریکی طرز زندگی عام ہو جائے تو وہاں کے دانشور اور مفکرین امریکا اور مغرب کی پالیسیوں کے سامنے بندہ بے دام بن جائیں گے۔ یہ طاقتیں ایڑی چوٹی کا زور لگائے ہوئے ہیں کہ ایسا ہو جائے لیکن اسلامی جمہوریہ ایران یہ ہونے نہیں دے رہا ہے۔
میں نے ٹکراؤ کے یہ بعض میدان گنوائے۔ میں یونہی جو ذہن میں ٹکراؤ کے اور میدان ہیں اگر گنواؤں تو مزید دس بارہ موضوعات کا ذکر کر سکتا ہوں، لیکن اگر ہم بیٹھ کر غور کریں، اگر ہم اور آپ دھیان دیں تو بیس تیس اہم اختلافی مسائل کی نشاندہی کر سکتے ہیں۔
اب آتے ہیں اس بنیادی مسئلے کی جانب جو میرے پیش نظر ہے۔ اسلامی جمہوریہ ایران اور استکبار کے درمیان شدید ٹکراؤ کا ایک اور موضوع نوجوانوں سے متعلق ہے۔ نوجوانوں کا مسئلہ ہے۔ آج نوجوانوں کے معاملے میں اسلامی جمہوریہ ایران کے خلاف امریکا، اس کے ہم نواؤں اور صیہونیوں کی بڑی وسیع سرد جنگ جاری ہے۔ میں نے چند سال پہلے طلبہ سے اپنے خطاب میں آپ یعنی نرم جنگ کے افسران سے (3)، آپ سب نرم جنگ کے افسران ہیں، میں یہ عرض کر چکا ہوں۔ اگر نوجوان کے اندر جذبات موجزن ہیں، خود اعتمادی ہے، تفکر و تدبر کی قوت ہے، شجاعت کا جذبہ ہے تو وہ افسر ہے۔ نرم جنگ کا افسر ہے، یہ نوجوان کی خصوصیت ہے۔
اب آپ مثال کے طور پر اسلامی جمہوریہ کی پسندیدہ شناخت رکھنے والے افسر کا مقابلہ اسلامی جمہوریہ کے دشمن کو مطلوب تشخص والے افسر سے کیجئے اور دیکھئے کہ کیا شکل سامنے آتی ہے۔ ہماری بحث اس وقت نرم جنگ کے بارے میں ہو رہی ہے جو باقاعدہ عسکری تصادم سے زیادہ خطرناک ہے۔ کبھی کبھی ہمیں فوجی حملےاور بمباری وغیرہ کی بھی دھمکیاں دی جاتی ہیں، لیکن یہ ان کی کوری حماقت ہے۔ یہ ان کے بس کی بات نہیں ہے، ان کی اتنی اوقات نہیں ہے۔ ان کے پاس ایسا کرنے کی ہمت نہیں ہے اور اگر انھوں نے حملہ کیا تو منہ کی کھائیں گے۔
البتہ نرم جنگ کے امکانات بیشک موجود ہیں، بلکہ یہ جنگ اس وقت بھی جاری ہے۔ فریق مقابل اس وقت بھی حملے کر رہا ہے اور ادھر ہم بھی کارروائی میں مصروف ہیں، اب ہماری یہ کارروائی اقدامی ہے یا دفاعی یہ ایک الگ بحث ہے۔ میرا نظریہ یہ ہے کہ ہماری طرف سے بھی صرف دفاع کے بجائے حملہ بھی ہونا چاہئے اور ساتھ ہی ساتھ دفاعی مراکز کو بھی محفوظ رکھنا چاہئے۔ تو ایک جنگ جاری ہے۔ اس نرم جنگ کو آپ باقاعدہ عسکری ٹکراؤ سے تشبیہ دے سکتے ہیں۔ ان حالات سے تشبیہ دے سکتے ہیں جو اس وقت شام، عراق یا یمن اسی طرح دوسری جگہوں پر ہیں۔ یہ جنگیں جو آج ہو رہی ہیں، یا مقدس دفاع کے دوران جو جنگ تھی، اس وقت آٹھ سال تک ایران میں جنگ رہی۔ جنگ کے ان حالات میں آپ ایک افسرے کے بارے میں سوچئے جو اپنی چھاونی میں یا اپنے بنکر میں بیٹھا ہوا ہے۔ یہ افسر دو طرح کا ہو سکتا ہے۔ اس افسر کا دو طرح کا تشخص ہو سکتا ہے، اس کی دو طرح کی تعریفیں ہو سکتی ہیں۔ ایک تو یہ کہ وہ پرعزم، ہوشیار، جوش و جذبے سے سرشار، بلند ہمت، محنتی، صاحب فکر، شجاع اور فداکار ہو۔ اگر ان خصوصیات اور اوصاف کا افسر چھاونی یا بنکر میں موجود ہے تو اس جنگ کے ممکنہ نتیجے کا اندازہ لگایا جا سکتا ہے۔ افسر شجاع ہے، ذی فہم ہے، صاحب فکر ہے، ایمان، امید اور عزم و جزم رکھتا ہے۔ یہ الگ انداز کا افسر ہے۔ اسی طرح ایک الگ انداز کا افسر بھی ہو سکتا ہے، جس کی الگ شخصیت اور الگ تشخص ہے۔ مثال کے طور پر وہ ایسا آدمی ہے جس پر مایوسی طاری ہے، یعنی وہ سوچتا ہے کہ لڑنے سے کوئی فائدہ نہیں ہے، کہتا ہے کہ ہم بلا وجہ یہاں محاذ پر ڈٹے ہوئے ہیں، کوئی فائدہ نہیں ہے، ناامیدی میں مبتلا ہے۔ یا وہ کوئی ایسا انسان ہے جو بہ آسانی ہتھیار ڈال دینے والا ہے، مزاحمت کرنے اور استقامت دکھانے کا حوصلہ نہیں رکھتا، ممکن ہے کہ تھوڑی دیر مقابلہ کرے لیکن جب دباؤ بڑھ جائے تو ہتھیار ڈال دینے میں عافیت سمجھے، اس طرح کا مزاج رکھتا ہو۔ یا فریب کھا جانے والا انسان ہو۔ دشمن اگر مسکرا کر بات کر لے تو اس پر فورا فریفتہ ہو جائے۔ فریب میں آکر بھروسہ کر بیٹھے، سمجھ ہی نہ پائے کہ اسے دھوکا دیا جا رہا ہے۔ جنگ فریب اور دھوکے سے بھری ہوتی ہے۔ ساری جنگوں میں یہی ہوتا ہے؛ اَلحَربُ خُدعَة (۴)، انھیں عسکری مقابلہ آرائیوں میں ایک بنیادی کام جو مقتدر کمانڈر ہی انجام دے پاتا ہے، یہ ہے کہ کسی کارروائی سے، کسی اقدام سے دشمن کو دھوکا دے۔ دشمن کو یہ محسوس ہو کہ اس جگہ سے حملہ ہونے والا ہے، اس کی توجہ اسی جانب مرکوز ہو اور پھر پیچھے سے زوردار حملہ کیا جائے۔ اب اگر یہ افسرا ایسا ہے جو آسانی سے دھوکا کھا جائے، دشمن کے فریب کو سمجھ نہ پائے، پہچان نہ سکے۔ یا حوصلہ ہارا ہوا انسان ہے۔ بس چاہتا ہے کہ کوئی گوشہ عافیت مل جائے اور وہ وہیں سکون سے سو جائے۔ منشیات کا عادی ہے، شہوانی خواہشات کا اسیر ہے، یا اسے ان کمپیوٹر کھیلوں کا نشہ ہے جو آج کل بہت رائج ہو گئے ہیں، میں نے سنا ہے کہ کچھ لوگوں کو اس کا بھی نشہ ہو جاتا ہے، اسے نہ اپنی فکر ہے اور نہ ان لوگوں کی جنھوں نے اس کے وجود سے امیدیں وابستہ کر رکھی ہیں۔ یا محاذ میں بیٹھ کر عیش و عشرت میں مصروف ہے۔ ایسے بھی افسر ہو سکتے ہیں۔ مگر اس صورت میں جنگ انجام کیا ہوگا؟ بالکل واضح ہے۔ جنگ کے افسروں کی دو طرح کی تعریفیں ہو سکتی ہیں۔ یہ بھی دشمنوں اور ہمارے درمیان اختلاف کا بڑا اہم مسئلہ ہے۔
دشمن کی مرضی ہے کہ ہمارے جنگ کے افسران کسی اور طرح کے ہوں جبکہ اسلامی جمہوریہ الگ فکر و مزاج کے افسران کی خواہشمند ہے۔ اسلامی جمہوریہ میں یہ جو دینداری، پاک دامنی، پارسائی اور پرہیزگاری پر اتنی زیادہ تاکید کی جاتی ہے، اسے رجعت پسندی اور بنیاد پرستی وغیرہ پر محمول نہ کیا جائے۔ ہرگز نہیں، یہ تربیت کی روش ہے۔ یہ نرم جنگ کے افسر کی تعریف سے ماخوذ ہے۔ یہ امریکا سے ہمارے ٹکراؤ کا ایک میدان ہے۔ امریکی چاہتے ہیں کہ ہمارے نوجوانوں میں وہ شجاعت نہ ہو، وہ جذبہ امید نہ ہو، وہ حوصلہ و ہمت نہ ہو، وہ تحرک اور جذبہ عمل نہ ہو، وہ جسمانی توانائی نہ ہو، وہ فکری استعداد نہ ہو، وہ اپنے دشمن کے بارے میں خوش فہمی میں مبتلا ہو جائیں، اپنے فوجیوں اور اپنی سپورٹ کو کمزور اور بے لیاقت تصور کرنے لگیں۔ دشمن چاہتا ہے کہ ہمارے افسران ایسے ہوں۔ ریڈیو، ٹیلی ویزن اور انٹرنیٹ کی مدد سے دشمن کے پروپیگنڈے اور گوناگوں سرگرمیوں کا مقصد یہی ہے۔ ان کے حملوں کی آماجگاہ ہمارے نوجوان ہیں۔ ایرانی نوجوان کو وہ ایسے عناصر میں تبدیل کر دینا چاہتے ہیں جس کے اندرہ نہ صحیح جذبہ ایمانی ہو، نہ یہ شجاعت ہو، نہ جوش و جذبہ ہو، نہ امید و نشاط ہو، ایسا بنا دینا چاہتے ہیں۔ اسلامی جمہوریہ اس کے بالکل برخلاف سمت میں ہے۔ اسلامی جمہوریہ چاہتی ہے کہ یہ نوجوان فعال اور اثرانگیز بنے۔
یہاں آپ عزیزوں سے، اپنے پیارے بچوں سے میری گزارش ہے؛ آپ کردار ادا کیجئے، اپنے ہم عمر نوجوانوں کو، ہائی اسکول کے اپنے ساتھیوں کو، اس تعریف کے مطابق ڈھالئے اور ایسا بننے میں ان کی مدد کیجئے۔ یہ اسلامی انجمنوں کا فریضہ ہے۔ ظاہر ہے یہ اسی صورت میں ممکن ہوگا جب آپ خودسازی میں اور خود کو سنوارنے میں پہلے کامیابی حاصل کر چکے ہوں گے۔ بحمد اللہ جیسا کہ ابھی جناب الحاج علی اکبری نے فرمایا، میں واقعی آپ کی رپورٹ سے بہت خوش ہوا، کم و بیش اسی طرح کی رپورٹ میرے پاس تھی، مجھے اطلاع تھی، لیکن آپ نے آج یہاں بڑی صراحت کے ساتھ بیان کیا، کافی حد تک ایسا ہی ہے۔ تو آپ خود سازی بھی کیجئے اور دوسروں کو بھی سنوارئے۔ یہ فریضہ صرف آپ اسکولی طلبہ کی اسلامی انجمنوں تک محدود نہیں ہے، یونیورسٹی طلبہ کی اسلامی انجمنوں کا بھی یہ فریضہ ہے۔ جہاں کہیں بھی اسلامی انجمن، خواہ وہ اسکولی بچوں کی ہو یا یونیورسٹیوں کے طلبہ پر مشتمل ہو، اگر ان مذکورہ اوصاف اور شمائل والے نوجوانوں کی تربیت کے بجائے، برعکس سمت میں کام کرے، یا تربیت میں کوتاہی برتے تو اس نے گویا اپنے فریضے کے برخلاف عمل کیا ہے۔ اس نے اللہ کی مرضی کے برخلاف عمل کیا ہے۔ دعائے مکارم الاخلاق میں انسان اللہ تعالی سے درجنوں چیزوں کی التجا کرتا ہے جو بڑی اہم ہیں۔ منجملہ؛ وَ استَعمِلنی لِما تَسأَلُنی غَدًا عَنه (۵) مجھے ایسے کاموں میں مصروف کر دے جن کے بارے میں روز قیامت تو مجھ سے سوال کرے گا۔ ہم سب کو جواب دینا ہے، ہم سب جوابدہ ہیں۔ آپ نوجوان ہیں، ہم بوڑھے ہیں، لیکن جواب سب کو دینا ہے۔ نوجوان بھی بوڑھوں کی مانند جوابدہ ہیں، کوئي فرق نہیں ہے۔ آپ محنت کیجئے، یونین کی کوشش یہ ہونا چاہئے کہ اپنا پیغام زیادہ سے زیادہ نوجوانوں تک پہنچائے۔ ہم یہ نہیں کہتے کہ اسلامی انجمنوں کی تعداد بڑھائيے، بلکہ اپنی تبلیغ اور اطلاع رسانی اور نوجوانوں پر اسلامی انجمنوں کے اثر و رسوخ میں اضافہ کیجئے۔ ممکن ہے کوئی نوجوان، انجمن میں شامل نہیں ہے اور آئندہ بھی شامل نہیں ہونا چاہتا، تو اس میں کوئی حرج نہیں ہے۔ اسلامی انجمنوں کو اس انداز سے کام کرنا چاہئے کہ ان کی بات سننے والوں کی تعداد بڑھے۔ لوگوں پر ان کی بات کا اثر ہو۔ اثر پیدا کرنے کا طریقہ یہی ہے جو میں نے عرض کیا، یعنی اسلامی نوجوان کی شخصیت و تشخص کی اس طرح سے تعمیر جس طرح اسلامی جمہوریہ چاہتی ہے۔ جس طرح اسلامی جمہوریہ تعریف کرتی ہے، اس طرح نہیں جو امریکا اور صیہونی سرمایہ داروں کو پسند ہے۔ یہ فریضہ ہے۔ یہ کام آپ توجہ سے کیجئے۔ مجھے یونین کے پروگراموں کی اطلاع ہے۔ مجھے رپورٹ بھی سونپی گئی، میں نے اسے دیکھا۔ رپورٹ بھی اچھی تھی۔ پروگرام بھی اچھے تھے، لیکن اس کی روز بروز تقویت کرنے کی ضرورت ہے۔ اس کے معیار اور اس کی مقدار میں مسلسل اضافہ ہونا چاہئے۔
ملک کو آپ کی احتیاج ہے۔ ملک کو ان دسیوں لاکھ اسکولی اور یونیورسٹی طلبہ کی شدید ضرورت ہے جو ملک میں موجود ہیں۔ ہمیں مومن، وفادار، پرامید، پرعزم، فعال اور اختراعی صلاحیت رکھنے والے نوجوانوں کی ضرورت ہے۔ ملک کو اور ملک کے مستقبل کو ایسے نوجوانوں کی ضرورت ہے۔ یہ صحیح ہے کہ اسلامی جمہوریہ کی عمر 37 سال ہو چکی ہے اور 37 سال کے اس عرصے میں دشمن ہمارا کچھ نہیں بگاڑ سکا۔ یہ بالکل صحیح ہے، لیکن؛
«دشمن نتوان حقیر و بیچاره شمرد»؛(6)